Səhiyyə Nazirliyi V.Y.Axundova adına Elmi-Tədqiqat Tibbi Profilaktika İnstitutunda 28 May - Müstəqillik Günü münasibətilə tədbir təşkil edilib.

İnstitutdan Aztibb.az-a verilən məlumata görə, Dövlət Himninin səsləndirilməsi ilə başlayan tədbiri giriş nitqi ilə institutun direktoru, professor Adil Allahverdiyev açıb. O, müsəlman Şərqində demokratiya ənənələrinin formalaşmasına böyük təsir edən Azərbaycan Xalq Cümhuriyyətinin yaradılması tarixinə və 23 ay mövcud olan Cümhuriyyətin gördüyü böyük işlərə diqqət çəkib.

Dövlət müstəqilliyimizin yenidən bərpasından sonra ilk illərdə yaşanan siyasi prosesləri nəzərə çatdıran direktor Azərbaycan Respublikasının müstəqilliyinin qorunması və əbədiləşdirilməsində Ulu Öndər Heydər Əliyevin tarixi xidmətlərini vurğulayıb. Ümummilli Liderin dövlətçilik, güclü Azərbaycan konsepsiyasını layiqincə gerçəkləşdirən Prezident İlham Əliyevin siyasi iradəsi ilə Vətənimizin bütün sahələrdə uğurlara imza atdığını, ərazi bütövlüyümüzün təmin olunduğunu bildirən Adil Allahverdiyev ölkəmizin Müstəqillik Gününü qalib və qürurlu xalq kimi qeyd etdiyini deyib.

Daha sonra institutun fəaliyyətində fərqlənən işçilərin mükafatlandırılma mərasimi keçirilib. İşçilərə fəxri fərman və hədiyyələr təqdim edən direktor Adil Allahverdiyev onlara gələcək fəaliyyətlərində uğurlar arzulayıb.