Yüksək qan təzyiqi olaraq da bilinən hipertoniya ilə bağlı son araşdırmalar xəstəliyin gündəlik həyatın bir çox sahələrində insana mənfi təsir etdiyini göstərir.

Aztibb.az-ın medimagazin.com.tr-yə istinadla xəbərinə görə, Ümumdünya Səhiyyə Təşkilatı (ÜST) mayın 15-də dərc etdiyi son araşdırmasında duz istehlakı ilə hipertoniya arasında sıx əlaqəni müzakirə edib.

Araşdırma, gündəlik həyatda duz istifadəsinin azaldılmasının Avropada minlərlə insanın həyatını xilas etdiyini ortaya çıxarıb.

Araşdırmada qeyd olunub ki, hipertoniya adətən heç bir əlamət göstərmir və nəzarət altında saxlanmasa, dağıdıcı nəticələr verə bilər.

Tədqiqatda yüksək miqdarda duz istifadəsinin qan təzyiqini artırdığı ifadə edilib, duz istehlakını azaltmaqla hipertoniyanı nəzarətdə saxlamağın mümkünlüyü bildirilib.

Mayın əvvəlində ABŞ-ın Boys Town Milli Tədqiqat Xəstəxanasının İnsan Neyrologiya İnstitutunun tədqiqatçıları tərəfindən dərc edilən bir araşdırma isə hipertoniyanın yaddaşa təsir etdiyini göstərib. Tədqiqatda hipertoniyanın şifahi yaddaşın kodlaşdırılması zamanı yaşanan sinir anormallikləri ilə əlaqəli olduğu qənaətinə gəlinib.

ÜST-nin hesabatında hipertoniya ilə bağlı məlumatlılığın artırılmasında təkcə səhiyyə işçilərinin deyil, qeyri-hökumət təşkilatlarının, cəmiyyətin və siyasətçilərin də rolu olduğu bildirilib.