Türkiyənin Tokat Gaziosmanpaşa Universiteti (TOGÜ) Biologiya Bölümünün dosenti Adem Kəskin bildirib ki, gənə Krım-Konqo Qanamalı Atəşi (KKKA) xəstəliyinə səbəb olmaqla yanaşı, 200-ə yaxın xəstəlik də daşıyır.

Bu barədə Aztibb.az medimagazin.com.tr-yə istinadla bildirir.

A.Kəskin qeyd edib ki, Türkiyədə KKKA xəstəliyinin diaqnozu və yayılmasından sonra bu sahədə araşdırmalar intensivləşib.

2008-ci ildən gənə üzərində çalışdıqlarını deyən alim, Ondokuz May və Artvin Çoruh universitetləri ilə ortaq şəkildə vəhşi heyvanlar üzərində gənə və onların ötürdüyü xəstəliklərlə bağlı araşdırmaları davam etdirdiklərini açıqlayıb.

A.Kəskin 2000-ci illərin əvvəllərində "Hyalomma marginatum" gənə növünün populyasiyasının artması və insanlarda KKKA xəstəliyinin ortaya çıxması ilə araşdırmaların intensivləşdiyinə diqqət çəkərək deyib: "Yay aylarında havalar isindikcə gənələrin aktivliyi artır. Uzun müddətdir ki, gənələrin CCHFV virusunu ötürdüyü məlumdur. Ölkəmizdə ilk dəfə 2002-ci ildə Tokatda tibb bacısında KKKA xəstəliyi aşkar edilib. KKKA xəstəliyi aşkar edilməmişdən əvvəl gənə üzərində araşdırmalar aparılıb. Ölkəmizdə 2002-ci ildən sonra gənələrin ölkəmizə xas bir problem olmadığına dair intensiv araşdırmalara başlanılıb".