Azərbaycan Respublikası Qida Təhlükəsizliyi Agentliyinin (AQTA) nümayəndə heyəti Belarus Respublikasında işgüzar səfərdə olub.

AQTA-dan Aztibb.az-a verilən xəbərə görə, səfər çərçivəsində nümayəndə heyət ilə bu ölkənin Kənd Təsərrüfatı və Ərzaq Nazirliyində görüş keçirilib.

Görüşdə ölkələrimiz arasında qida obyektlərinin təsdiq sistemlərinin ekvivalentliyinin tanınması məsələsi müzakirə edilib. Nazir müavini İvan Smilgin nümayəndə heyətinə Belarus Respublikasında aparılan qiymətləndirmədə uğurlar arzulayıb.

Eyni zamanda, AQTA əməkdaşları Belarus Respublikasının qida təhlükəsizliyi sistemi və yüksək riskli heyvan mənşəli məhsulların istehsalı və emalı müəssisələrinin təsdiqi prosesi ilə yaxından tanış olublar. Belarus Dövlət Baytarlıq Mərkəzinə məxsus laboratoriyalara, 1 nömrəli Minsk Süd Zavoduna, Slonimskiy Ət Kombinatına və Komarovski bazarına baş çəkiblər.

Səfər zamanı iki qurum arasında qarşılıqlı əməkdaşlığa dair fikir mübadiləsi aparılıb, əlaqələrin daha da gücləndirilməsinin və qarşılıqlı səfərlərin davam etdirilməsinin vacibliyi vurğulanıb.