Səfər çərçivəsində xəstəxanaların Cərrahiyyə şöbəsi, Əməliyyat bloku, Reanimasiya şöbəsi, Doğum şöbəsi, Təcili yardım bölməsinə baxış keçirilib. Baxış zamanı mövcud infrastruktur və avadanlıqlarla tanış olublar.
Səfərin yekununda Qazax Rayon Mərkəzi Xəstəxanasında Vüqar Yaqublunun təqdimatında “Region tibbinin inkişafında xaricdə çalışan azərbaycanlı həkimlərin potensialından istifadə yolları”, “Regionlarda zəruri cərrahi xidmətin təşkilində beynəlxalq standartlar” mövzularında konfrans keçirilib. Konfransda Şəmkir, Tovuz, Qazax, Ağstafa və Gədəbəy rayon mərkəzi xəstəxanalarının direktorları, həkim-cərrahları və həkim-anestezioloq-reanimotoloqları iştirak ediblər.
V.Yaqublu ilk olaraq xaricdə çalışan hər bir azərbaycanlı həkimin milli səhiyyə sisteminin inkişafına necə töhfə verməsindən və gələcəkdə necə kömək edəcəklərindən danışıb. O bildirib ki, xaricdə təhsil alan və çalışan azərbaycanlı həkimlərin bir qrupu artıq Azərbaycanda TƏBİB-in tabeliyində olan tibb müəssisələrində fəaliyyət göstərirlər:
“Bu tədbirlər Azərbaycanın ucqar regionlarında da davam etdiriləcək. Xaricdə yaşayan və çalışan həkimlərlə Azərbaycandakı tibb müəssisələrində işləyən həkimlərin mütəmadi nəzəri və əyani təcrübə mübadiləsi aparılacaq”.
O, bundan sonra da belə tədbirlərin davamlı olaraq keçiriləcəyini vurğulayıb. Bu istiqamətdə TƏBİB-in gördüyü işlərdən, həmçinin ilk dəfə keçirilən Dünyadakı Azərbaycanlı Təbiblərin Simpoziumu, TƏBİB və Almaniyanın Haydelbelq Universitetinin Manhaym Tibb fakültəsi ilə əməkdaşlıq müqaviləsindən söz açıb.
Daha sonra Qazax Rayon Mərkəzi Xəstəxanasında “Təbiəti də sağaldaq” devizi ilə başladılan ağacəkmə aksiyası keçirilib.
2024-cü ilin "Yaşıl dünya naminə həmrəylik ili" elan edilməsi ilə əlaqədar olaraq Qazax Rayon Mərkəzi Xəstəxanasında keçirilən aksiyada TƏBİB-in İcraçı direktorunun müavini Araz Nəsirov, Almaniyanın Haydelberq Universitetinin Manhaym Tibb fakültəsinin Cərrahiyyə klinikasının həkimi, cərrah-onkoloq, t.ü.f.d, dosent Vüqar Yaqublu, Qazax Rayon Mərkəzi Xəstəxanasının direktoru Sevda Məmmədova, ətraf 4 rayonun direktorları və digər rəsmi şəxslər iştirak ediblər.
