Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən Elm və Təhsil Nazirliyinin dəstəyi ilə bu ilin mart-aprel aylarında gənc nəsil arasında geniş maarifləndirmə aparılıb.

 

İSİM-dən Aztibb.az-a bildirilib ki, Bakı şəhəri 37, 112, 216, 262, 290 nömrəli orta məktəblərdə, Turizm və Sosial Xidmətlər üzrə Bakı Dövlət Peşə Təhsil Mərkəzi, İctimai İaşə və Xidmət üzrə Bakı Dövlət Peşə Təhsil Mərkəzi, Texnika və Texnologiyalar üzrə Bakı Dövlət Peşə Təhsil Mərkəzi, Rabitə və İnformasiya Texnologiyaları üzrə Bakı Dövlət Peşə Təhsil Mərkəzi, Sənaye və İnnovasiyalar üzrə Bakı Dövlət Peşə Təhsil Mərkəzlərində sağlamlığın qorunması, məişət zorakılığının qarşısının alınması mövzusunda geniş maarifləndirmə tədbirləri keçirilib.

 

İSİM-in Təlim və resurs şöbəsinin müdir müavini Pərvin Quliyeva, həkim metodist Afət Məmmədova geniş təqdimatlarla çıxış edərək, zorakılıq, gender bərabərliyi, məişət zorakılığı, uşaqlara qarşı zorakılığın növləri və müdafiə mexanizmləri, kiberbullinq (kiber zorakılıq) haqqında ətraflı məlumat veriliblər. Vurğulanıb ki, məişət zorakılığına səbəb olan halların aradan qaldırılması üçün səhiyyə işçiləri tərəfindən əhali arasında mütəmadi olaraq geniş təşviqat aparılır və zorakılığa məruz qalan şəxslərin ixtisaslaşdırılan tibbi yardım göstərən müəssisələrə vaxtında müraciət etməsi tövsiyə olunur.

 

Tədbirlərdə iştirakçıları maraqlandıran suallar cavablandırılıb və onlara İSİM tərəfindən hazırlanaraq çap edilən maarifləndirici materiallar təqdim edilib.