Salyan Rayon Mərkəzi Xəstəxanasında qapalı travmatoloji əməliyyatların uğurla icra olunması davam etdirilir.
Xəstəxanadan Aztibb.az-a bildirilib ki, tibb müəssisəsinin Cərrahiyyə şöbəsinin həkim-travmatoloqları tərəfindən qapalı yerdəyişən sınıqların lövhə və vintlərlə osteosintez əməliyyatı uğurla icra olunub.
Belə ki, tibb müəssisəsinə müraciət edən 1953-cü il təvəllüdlü (qadın cinsli) şəxsin ilkin müayinələri aparılıb, ona sol bud sümüyünün diafizinin orta 1/3-nin qapalı yerdəyişən sınığı diaqnozu qoyulub. Sol bud sümüyünün qapalı intramedulyar osteosintezi əməliyyatı olunan pasiyent zəruri tibbi xidmətlər göstərildikdən sonra ambulator müalicə üçün evə buraxılıb.
Qeyd edək ki, TƏBİB tərəfindən Salyan Rayon Mərkəzi Xəstəxanası müasir elektron optik görüntüləmə cihazı, travmatoloji əməliyyat alətləri ilə təmin olunub. Bununla da tibb müəssisəsində yeni avadanlıqlarla icra oluna bilən mürəkkəb əməliyyatlara start verilib.