Naxçıvan Muxtar Respublikasının 100 illik yubileyinə həsr olunmuş “Tibbdə aktual mövzular” adlı elmi-tibbi konfrans keçirilib.

Naxçıvan MR Səhiyyə Nazirliyindən Aztibb.az-a bildirlib ki, əvvəlcə torpaqlarımızın azadlığı uğrunda canından keçən şəhidlərimizin ruhları bir dəqiqəlik sükutla yad edilib, Dövlət Himni səsləndirilib.

Tədbirdə giriş nitqi ilə çıxış edən Naxçıvan Muxtar Respublikası səhiyyə nazirinin birinci müavini, nazir vəzifələrini icra edən Samiq Sadıxov muxtar respublikada səhiyyənin inkişafına və tibbi xidmətlərin keyfiyyətinin artırılmasına yönəlmiş məqsədyönlü islahatlar barədə ətraflı məlumat verib. Tibbdə yeniliklərin tətbiqi, təcrübə mübadiləsi, elmi biliklərin artırılması baxımından elmi-praktik konfransların əhəmiyyətinə diqqət çəkib.

Samiq Sadıxov çıxışında Azərbaycan Respublikasının Əməkdar Elm Xadimi, Əməkdar həkim, tibb elmləri doktoru, professor Lalə Allahverdiyevanın Duzdağ Fizioterapiya Mərkəzinin fəaliyyətindəki əvəzsiz töhfələrindən danışıb, bugunkü konfransın təşkilindəki əməyinə görə ona təşəkkür edib.

Sonra Azərbaycan Tibb Universitetinin Klinik allerqologiya və immunologiya kafedrasının müdiri, “Azərbaycan klinik allerqoloqlar və immunoloqlar cəmiyyəti”nin prezidenti, Azərbaycan Pediatrlar Assosiasiyasının vitse-prezidenti, Əməkdar həkim, tibb elmləri doktoru, professor Lalə Allahverdiyeva “Allergik rinitin müalicəsində yeniliklər’ mövzusunda məruzə ilə çıxış edib.

Professor allergik rinitin diaqnostikası, digər xəstəliklərlə differensiasiyası, düzgün yanaşma, müalicə prinsipləri haqqında danışıb.

Sonra Azərbaycan Tibb Universitetinin Uşaq xəstəlikləri kafedrasının dosenti, Azərbaycan Pediatrlar Assosiasiyasının sədri, Avrasiya Pediatrlar Federasiyasının vitse-prezidenti Təranə Tağızadə “Uşaqlarda kəskin qastroenterit” mövzusunda çıxış edib.

Sual-cavab sessiyasının ardından konfrans işini yekunlaşdırıb.