Beynəlxalq Ağız və Üz-çənə Cərrahların Assosiasiyası (IAOMS) Beynəlxalq Qadınlar Günü və Qadın Tarixi Ayı münasibətilə ağız və üz-çənə cərrahiyyəsi sahəsində qadın həkimlərin töhfələrinə həsr olunmuş layihə hazırlayıb. Layihənin əsas məqsədi tibb elminin inkişafında qadınların rolundan danışmaq və onların nailiyyətlərini beynəlxalq səviyyədə nümayiş etdirməkdir.

Aztibb.az-ın xəbərinə görə, böyük marağa səbəb olan layihəyə ATU-nun Ağız və üz-çənə cərrahiyyəsi kafedrasının dosenti Nigar Sultanova da daxil edilib.

Qeyd edək ki, N.Sultanova ATU-da təhsil alıb, 2000-ci ildə tibb elmləri sahəsində fəlsəfə doktoru elmi dərəcəsi almaq üçün dissertasiya işini uğurla müdafiə edib. 2003-2004-cü illərdə İstanbulda, professor Onur Erolun rəhbərliyi ilə Elmi Plastik Cərrahiyyə İnstitutunda (ONEP) plastik cərrahiyyə üzrə təcrübə keçib. 2012-ci ildə ATU-nun Ağız və üz-çənə cərrahiyyəsi kafedrasına dosent vəzifəsinə təyin olunub. 2000-2005-ci illər ərzində N.Sultanova professor Lesli Farkasın rəhbərliyi altında 26 etnik qrup/irqdən olan şəxslərin antropometrik parametrlərinin öyrənilməsi üzrə beynəlxalq layihədə iştirak edib. Üz antropometrik parametrlərinin dünyanın ən böyük müqayisəli məlumat bazası 2005-ci ildə “Journal of Craniofacial Surgery” jurnalında dərc olunub. O, sitat indeksi 900-dən çox olan 73-dən çox elmi nəşrin müəllifidir. 2000-ci ildən bir sıra üz-çənə cərrahiyyəsi (AzOMS), (IAOMS), 2007-ci ildən plastik cərrahiyyə (ISAPS), (PRAS) və 1999-cu ildən antropologiya (EAA) cəmiyyətlərinin üzvüdür.

N.Sultanovanın cərrahi fəaliyyətinə anadangəlmə və qazanılmış üz deformasiyalarının aradan qaldırılmasında, kəllə-üz kompleksinin estetik və rekonstruktiv əməliyyatlarında nisbətlərin, harmoniyanın, simmetriyanın və relyefin bərpası daxildir.