Mərkəzdən Aztibb.az-a verilən xəbərə görə, Bakı şəhərində yerləşən ilkin səhiyyə xidməti müəssisələrinin ərazisində fəaliyyət göstərən məktəbəqədər və orta ümumtəhsil müəssisələrində 2024-cü ilin əvvəlində tərtib olunmuş qrafikə əsasən tibb heyəti tərəfindən uşaqların icbari dispanserizasiyasının tələblərinə uyğun olaraq ilkin müayinələri həyata keçirilir.

 

Həkim-pediatr, otorinolarinqoloq, oftalmoloq, stomatoloq, cərrah, həkim-nevropatoloq və s. ixtisas həkimlərindən ibarət həkim briqadası tərəfindən uşaqların müayinələri aparılır. Müayinələr zamanı uşaqlarda müəyyən xəstəliklər aşkarlandığı halda həmin uşaqlarla bağlı məlumatlar həm məktəb rəhbərliyinə, həm də valideynlərə təqdim edilir. Həmin şagirdlərin qısa zamanda ilkin səhiyyə xidməti göstərən tibb müəssisələrinə müraciət edərək geniştərkibli müayinələrdən keçməsi və aşkarlanan xəstəliklərin müalicəsinə başlaması ilə bağlı tövsiyələr verilir.

 

Qeyd edək ki, uşaqların icbari dispanserizasiyası Azərbaycan Respublikasının Prezidentinin 5 mart 2013-cü il Fərmanına uyğun olaraq davam etdirilir.

 

İcbari dispanserizasiyasının əsas məqsədi uşaqlar, o cümlədən məktəblilər arasında xəstələnmə, sağlamlıq imkanlarının məhdudluğunun və ölüm səviyyəsinin azaldılmasıdır.

 

İcbari dispanserizasiya zamanı uşaqlara illik profilaktik baxış həyata keçirilir. İcbari dispanserizasiya çərçivəsində uşaqlar hər il bir və ya bir neçə ixtisas üzrə mütəxəssislər (pediatr, stomatoloq, nevropatoloq, cərrah, endokrinoloq, uroloq, oftalmoloq, otorinolarinqoloq, dermatoloq və digər mütəxəssislər) tərəfindən diaqnostik və laborator müayinələrə cəlb edilir. Proses il ərzində mütəmadi şəkildə aparılır.