Çinin Siçuan əyaləti ilə Kəmər və Yol boyunca yerləşən ölkələrin beynəlxalq dostluq şəhərləri arasında tibb və səhiyyə sahəsində əməkdaşlığı və mübadilələri daha da inkişaf etdirmək məqsədilə Çin Xalq Respublikasının Siçuan Universitetinin Qərbi Çin Xəstəxanası tərəfindən 01-21.04.2024-cü il tarixlərində “Kəmər və Yol Təşəbbüsü Qaraciyər Minimal İnvaziv Texnologiya Təlimi Kursu” təşkil olunub.

Sözügedən təlimdə Yeni Klinikanın Ümumi cərahiyyə və transplantasiya departamentinin ümumi cərrahı Günay Allahverdiyeva iştirak edir.

Aztibb.az bu barədə TƏBİB-in feysbuk səhifəsinə istinadla xəbər verir.

Kurs çərçivəsində Qərbi Çin Xəstəxanasının Qaraciyər Transplantasiyası Mərkəzinə də səfər təşkil olunacaq.

Üç həftə müddətində davam edəcək təqaüdlü təlim kursu akademik biliklərin və yüksək ixtisaslaşmış hepatobiliar təcrübənin birləşməsi nəticəsində təlim iştirakçılarına minimal invaziv qaraciyər cərrahiyyəsi və transplantasiyası üzrə bilik əldə etmək üçün unikal imkan yaradacaq.

Sözügedən mərkəz qaraciyər cərrahiyyəsi, qaraciyər transplantasiyası (canlı donor qaraciyər transplantasiyası) və hepatobiliar xərçəngin biomarkerləri üzrə elmi araşdırmalar aparır.

Mərkəz canlı donor qaraciyər transplantasiyasını təkmilləşdirmək üçün minimal invaziv cərrahiyyə və digər yeni texnikaların istifadəsinə üstünlük verir.

Məlumat üçün bildiririk ki, Çin Xalq Respublikası 2013-cü ildə Avrasiya ölkələri arasında qarşılıqlı əlaqələrin qurulması və infrastrukturun yaradılmasına yönələn “Bir kəmər, bir yol” adlı yeni iqtisadi inkişaf strategiyasını elan etmişdir. Qeyd edək ki, Azərbaycan Respublikası bu layihəyə qoşulan ilk Cənubi Qafqaz ölkəsidir və bu gün də aktiv tərəfdaşlardan biridir.