“Loqos” Psixoloji və Nitq İnkişaf Mərkəzinin psixoloq və mütəxəssislərdən ibarət nümayəndə heyəti Bioloji Təbabət və İnteqrativ Müalicə Mərkəzində olub.

 

Bioloji Təbabət Klinikasından Aztibb.az-a verilən xəbərə görə, görüşdə qarşılıqlı əməkdaşlıq barədə təklif və fikirlər səsləndirilib.

 

İnteqrativ Müalicə Mərkəzinin baş həkimi Gülnar Quliyeva qonaqlara inteqrativ təbabətin müayinə və müalicə üsulları barədə məlumat verib. Qeyd edib ki, autizm xəstələrində bağırsaq keçiriliciyinin yüksəlməsi müşahidə edildiyindən canlı qanın müayinəsi həkimə daha ətraflı informasiya vermək baxımından vacib üsuldur.

 

Canlı qanın müayinəsi üzrə mütəxəssis Amalya Rəhimova isə autizmli xəstələrdə müayinə zamanı müşahidə etdiyi faktları görüş iştirakçıları ilə bölüşüb.

 

Sonra uşaq nevroloqu Təranə Həşimova, nevroloq Ülviyyə Səlimova, pediatr Sevinc Abdullayeva, həkim-fizioterapevt Nuriyyə Əlibəyli belə xəstələrin müalicəsində effekt almaq üçün komanda işinin vacibliyini vurğulayaraq İnteqrativ Müalicə Mərkəzinin uğurlu nəticələrindən danışıblar.

 

“Loqos” Psixoloji və Nitq İnkişaf Mərkəzinin rəhbəri Təranə Həşimova qeyd edib ki, autizm xəstələrinin müalicəsi üçün lazımi şəraitin olmasına baxmayaraq müalicə prosesində nevroloqların konsultasiyasına hər zaman ehtiyac duyulur. O, bu istiqamətdə Mərkəzlə birgə əməkdaşlığın faydalı olacağına inamını ifadə edib.

 

Mərkəzin Əhmədli, Gənclik, Xırdalan filiallarının psixoloqları da çıxışlarında autizmli xəstələrin müalicəsində əldə etdikləri uğurlar barədə məlumat veriblər.