Azərbaycan Tibb Universitetində (ATU) rektor, professor Gəray Gəraybəylinin  Sankt-Peterburqun Səhiyyə Komitəsinin sədr müavini Aleksey Tereşinin rəhbərlik etdiyi nümayəndə heyəti ilə görüşü baş tutub.

Bu məlumat Aztibb.az-a ATU-dan verilib.

Görüşdə rektor G.Gəraybəyli ölkəmizin qocaman ali təhsil mərkəzlərindən biri olan və zəngin ənənələri ilə tanınan Azərbaycan Tibb Universitetinin fəaliyyəti, tədris proqramındakı yeniliklər barədə qonaqlara ətraflı məlumat verib. Xarici tələbələrin sayına görə ATU-nun ölkədə birinci yerdə olduğunu bildirən rektor G.Gəraybəyli ali məktəbin beynəlxalq əlaqələrinin genişləndirilməsi istiqamətində son illər atılan addımlar barəsində də danışıb. Nümayəndə heyəti üzvlərinə həmçinin ATU-nun nəzdindəki klinikaların fəaliyyəti haqqında məlumat verilib. Rektor G.Gəraybəyli  qarşılıqlı görüş və müzakirələrin ATU ilə Sankt-Peterburqdakı tibb universitetləri arasındakı münasibətlərin inkişafına təkan verəcəyinə inandığını bildirib. 

Nümayəndə heyətinin rəhbəri, Sankt-Peterburqun Səhiyyə Komitəsinin sədr müavini Aleksey Tereşin bu şəhərdəki tibb mərkəzləri və müəssisələrinin fəaliyyəti haqqında danışıb.  Qonaq bu qurumlarla Azərbaycandakı elmi-tibb mərkəzləri və ATU ilə əməkdaşlığın gücləndirilməsi, əlaqələrin intensivləşdirilməsi və daha üst səviyyəyə qaldırılmasında maraqlı olduğunu bildirib.

Sonra tərəflər arasında qarşılıqlı əməkdaşlıq perspektivlərinə dair müzakirələr aparılıb.