İmsak vaxtı su qəbuluna xüsusi diqqət etmək lazımdır. Bunun üçün evdə hazırlanan az şəkərli limonadlar, ayran, meyvə kompotları için.

Aztibb.az xəbər verir ki, TƏBİB-in feysbuk səhifəsində Ramazanda içiləcək suyun miqdarı ilə bağlı məlumat paylaşılıb.

Məlumatda bildirilir:

"Mümkün qədər iftarla imsak arasında ən az 8-10 stəkan su için. Amma çay və qəhvənin su ehtiyatını qarşılamadığını unutmayın. Bədəndə su quruyarsa, səhhətiniz pisləşə və xəstəxanaya düşə bilərsiniz!

İmsakda qidalanma üçün vacib olan məqamlar bunlardır:

İmsakadan yarım saat öncə iki stəkan su içilməsi məsləhətdir;
Enerjili qidalara üstünlük verilməlidir;
Lifli qidalardan daha çox istifadə edilməlidir;
Duzlu, ədviyyatlı qidalardan uzaq durulmalıdır;
Boyat yeməklərdən imtina edilməlidir;
Bal və mürəbbə qəbulu məsləhət görülmür;
Süd, şit pendir, qaymaq və digər ağartı məhsulları, yumurta, şorba, tərəvəz, yarma plovu kimi yeməklər yeyilə bilər;
Yeməklərlə birlikdə təzə meyvə və ya qoz, badam kimi quru qidaların qəbul edilməsi enerji və mineral baxımından dəstəkləyici ola bilər;
Bədəndə su saxlayan qidalara daha çox üstünlük verilməlidir;
Tünd qara çay və qəhvə kimi kofeinli içkilər içilməməlidir;
Bitki çaylarına, az şəkərli kompotlara üstünlük verilməlidir.

Sağlamlığınız nəfsiniz qədərdir.

Allah Ramazan ayında tutduğunuz orucları və etdiyiniz duaları qəbul etsin!"