Milli Onkologiya Mərkəzində (MOM) Ekologiya və Təbii Sərvətlər Nazirliyinin 11 saylı Regional Ekologiya və Təbii Sərvətlər İdarəsi tərəfindən ekoloji maarifləndirici tədbir təşkil olunub.
MOM-dan Aztibb.az-a bildirilib ki, tədbir “Tibb müəssisələrində əmələ gələn müxtəlif növ tullantıların toplanması, saxlanması, emalı, zərərsizləşdirilməsi və kənarlaşdırılması mexanizminin həyata keçirilməsi” mövzusuna həsr edilib.
Tədbirdə Ətraf Mühitdən İstifadənin Tənzimlənməsi, Mətbuatla İş və Ekoloji Maarifləndirmə Sektorunun sektor müdiri Rafiq Ədilov və aparıcı məsləhətçisi Aynur Əbdüləzimova çıxış edərək müxtəlif növ tibbi tullantıların toplanması, saxlanılması, emalı, zərərsizləşdirilməsi və kənarlaşdırılması mexanizmini izah ediblər.
Rafiq Ədilov vurğulayıb ki, tibbi tullantıların ətraf mühitə və insan sağlamlığına vura biləcək zərərli təsirinin qarşısının alınması məsələləri rəhbərlik tərəfindən hər zaman diqqətdə saxlanılır, tapşırıqlar verilir və bununla bağlı mütəmadi olaraq monitorinqlər təşkil edilir.
Tədbirin sonunda iştirakçıları maraqlandıran suallar cavablandırılıb, müzakirələr aparılıb.
