TƏBİB-də kommunikasiya və ictimaiyyətlə əlaqələr işinin effektiv qurulması məqsədilə “İctimaiyyətlə əlaqələr işinin təkmilləşdirilməsi” mövzusunda növbəti təlim keçirilib.
Aztibb.az-a TƏBİB-dən bildirilib ki, təlim qurumun "2024-2026-cı illər üzrə Kommunikasiya Strategiyası”ı çərçivəsində təşkil olunub.
Təlimdə TƏBİB-in tabeliyində fəaliyyət göstərən bəzi tibb müəssisələrinin ictimaiyyətlə əlaqələr üzrə 33 mütəxəssisi iştirak edib.
Təlimdə çıxış edən TƏBİB-in İctimaiyyətlə əlaqələr və kommunikasiya departamentinin rəhbəri Zamirə Ədilova ictimaiyyətlə əlaqələr üzrə mütəxəssislərin koordinasiyalı fəaliyyətinin əhəmiyyəti, media ilə düzgün işin qurulması və tibb müəssisələrinin sosial mediadakı fəaliyyəti ilə bağlı fikirlərini bölüşüb.
TƏBİB-in İctimaiyyətlə əlaqələr və kommunikasiya departamentinin İctimaiyyətlə əlaqələr şöbəsinin müdiri Elnur Hidayətoğlu ictimaiyyətin məlumatlandırılması işinin düzgün təşkili məsələsinə toxunub, əsas çətinlik və problemləri diqqətə çatdırıb. O, görülən işlərin təbliği, hədəf auditoriyanın idarəedilməsi və digər mövzular barədə məlumat verib.
“Sosial mediada peşəkar fəaliyyət: ən çox edilən səhvlər” adlı təqdimatla çıxış edən TƏBİB-in İctimaiyyətlə əlaqələr və kommunikasiya departamentinin İctimaiyyətlə əlaqələr şöbəsinin aparıcı məsləhətçisi Hicranə İsmayılova sosial media platformalarından istifadə qaydaları, sosial mediada fəaliyyətin təşkili, ən çox edilən səhvlər barədə konkret faktlar üzrə nümunələr göstərib, təlim iştirakçılarına xüsusi təlimatlar təqdim edib.
Təlim qarşılıqlı müzakirə və sual-cavab sessiyası ilə başa çatıb.
Məlumat üçün bildirək ki, TƏBİB-in tabeli tibb müəssisələrində hazırda 76 ictimaiyyətlə əlaqələr üzrə mütəxəssis çalışır.
