"Sağlamlığın Qorunması” İctimai Birliyi və TƏBİB arasında qarşılıqlı əməkdaşlığa dair anlaşma memorandumunun imzalanması məqsədilə görüş keçirilib.

Bu məlumat Aztibb.az-a İctimai Birlikdən verilib.

Görüşdə TƏBİB-in İcraçı direktorunun müavini Araz Nəsirov, direktorun müşaviri Emin Xəlilov, Tibbi təhsil və innovasiyalar departamentinin rəhbəri Teymur Mirzəbəyli və ictimai birliklərin nümayəndələri iştirak ediblər.

Tədbirdə TƏBİB-in İcraçı direktorunun müavini Araz Nəsirov çıxış edərək bu cür əməkdaşlıqların səhiyyə sisteminin daha da inkişafına, gələcəkdə aktiv layihələrin həyata keçirilməsinə, tərəflər arasında faydalı, uzunmüddətli və effektiv əlaqələrin qurulmasına zəmin yaratdığını söyləyib.

Daha sonra Tibbi təhsil və innovasiyalar departamentinin rəhbəri Teymur Mirzəbəyli və digər əməkdaşlar çıxış ediblər.

“Sağlamlığın Qorunması” İB-nin sədri Yazgül Abdıyeva qeyd edib ki, bu sənəd əhalinin sağlamlığının qorunması sahəsində və davamlı tibbi təhsil çərçivəsində tibb işçilərinin ixtisasları üzrə biliklərinin artırılması məqsədi daşıyır. O, qarşılıqlı əməkdaşlığın Azərbaycanda səhiyyə sisteminin daha da inkişafına öz töhfəsini verəcəyini deyib, birgə uğurlu işlərə imza atmaq üçün əməkdaşlığın vacibliyini vurğulayıb.

Daha sonra TƏBİB və “Sağlamlığın Qorunması” İctimai Birliyi arasında qarşılıqlı əməkdaşlığa dair anlaşma memorandumu imzalanıb.