Bu gün Milli Onkologiya Mərkəzinin həkimi, ortopediya və travmatologiya uzmanı, ortopedik onkologiya, əl cərrahiyyəsi və mikrocərrahiyyə üzrə mütəxəssis Əlövsət İsayevin 50 yaşı tamam olur.

Aztibb.az xəbər verir ki, Əlövsət İsayev 1974-cü ildə Qərbi Azərbaycanın Amasiya rayonunda anadan olub. Bakıda orta məktəbi qızıl medalla bitirən həkim 1991-ci ildə Türkiyyədə təhsil almaq üçün keçirilən imtahanlardan yüksək bal toplayıb. 

O, 2000-2001-ci illərdə İstanbulda Qırmızı Aypara Cəmiyyətində həkim işləyib. 2002-ci ildə TUS imtahanını verərək Ege Universiteti Ortopediya və Travmatologiya kafedrasında ixtisaslaşma kursu keçib. 2006-cı ildə Ege Universitetində “Anevrizmal və bəsit sümük kistalarında müalicə nəticələri” mövzusunda dissertasiya işini uğurla müdafiə edərək ortopediya və travmatologiya üzrə uzmanlıq dərəcəsi alıb.

Əlövsət İsayev 2007-2008-ci illərdə İstanbul şəhərində özəl xəstəxanada ortopediya və travmatologiya mütəxəssisi olaraq fəaliyyət göstərib. 2009-cu ildən Milli Onkologiya Mərkəzində ortopediya və travmatologiya mütəxəssisi, həmçinin ortopedik onkoloq vəzifəsində çalışır.

Peşəkar həkim dayaq hərəkət aparatının bir çox xəstəliklərində lazım gələn mürəkkəb cərrahiyyə əməliyyatlarını müvəffəqiyyətlə dünya standartları səviyyəsində icra etməkdədir. O, apardığı tədqiqatlara dair ölkəmizdə və xaricdə çap olunmuş bir sıra məqalələrin müəllifidir.