Azərbaycan Respublikası Səhiyyə Nazirliyi K.Y.Fərəcova adına Elmi-Tədqiqat Pediatriya İnstitutunda (ETPİ) yenidoğulmuş körpələrdə eşitmə skrininqi ilə bağlı seminar keçirilib.

Aztibb.az-a Səhiyyə Nazirliyindən verilən xəbərə görə, ETPİ-də 2024-cü ilədək eşitmə funksiyasının pozulma riski olan uşaqlarda eşitmənin dəyərləndirilməsi aparılmayıb. Eşitmə funksiyasının dəyərləndirilməsi riskli uşaqlarda həyatlarının ilk 3-cü günü, təkrar 7-15-cü günü, təkrar 15-28-ci günündə aparıla bilər.

Eşitmə funksiyasının dəyərləndirilməsi, yenidoğulmuşların eşitmə skrininq testi haqqında İnstitutun otorinolarinqoloqu Gülşən Qədirli təqdimatla çıxış edib. O, müayinələrin keçirilməsinə 23 fevral 2024-cü il tarixindən start verildiyini kollektivin nəzərinə çatdırıb. Yenidoğulmuşların eşitmə skrininq testinin İcbari Tibbi Sığortanın “Xidmətlər Zərfi”nə daxil olması barədə xəstə xidmətləri şöbəsi tədbir iştirakçılarına məlumat verib. Hansı körpələrdə bu xidmət aparılacaqsa, onların xəstəlik tarixlərinə bu müayinə haqqında informasiyanın daxil edilməsi barədə ətraflı müzakirələr aparılıb və ambulator xidmət üçün blanklar hazırlanıb, kollektivə təqdim edilib.

Yenidoğulmuşların eşitmə skrininq testinin aparılması İnstitutda körpələrin hərtərəfli müayinəsini təmin etməklə tərəfimizdən göstərilən tibbi xidmətin keyfiyyətinin xeyli artmasına səbəb olacaq, sağlam nəslin yetişməsinə və vaxtında profilaktik tədbirlərin aparılmasına öz töhfəsini verəcək.