Qəbələ Rayon Mərkəzi Xəstəxanasında bu tibb müəssisəsinin və Qəbələ Rayon İcra Hakimiyyətinin təşkilatçılığı ilə “Peyvəndlənmə qızılca və digər infeksion xəstəliklərə qarşı effektiv profilaktika üsuludur” mövzusunda maarifləndirici tədbir keçirilib.

Rayon Xəstəxanasından Aztibb.az-a verilən məlumata görə, tədbirdə ədbirdə müəssisənin direktor müavini, ilkin səhiyyə xidmətinin rəhbəri Kamal Məmmədov çıxış edərək peyvəndlənməmiş şəxslərdə qızılca xəstəliyinin ağırlaşmalara və hətta qalıcı fəsadlara səbəb ola biləcəyini qeyd edib.

Daha sonra tədbir iştirakçılarının çıxışları dinlənilib. Bir sıra ağır respirator xəstəliklərin vaksinasiyasının uşaqlıq dövründə Milli Peyvənd Proqramına əsasən ilkin səhiyyə xidməti təşkil edən müəssisələrdə aparılmalı olduğu və yoluxmanın qarşısını almaq məqsədilə peyvəndləmənin vacibliyi qeyd edilib.

Həmçinin tədbirdə iştirakçılara mövcud vəziyyətlə əlaqədar maarifləndirici bukletlər paylanılıb.

Sonda mütəxəssislər tədbir iştirakçılarını maraqlandıran sualları cavablandırıblar.