Pilonidal sinus dəridən əmələ gələn ciblər və onların iltihabi ağırlaşmalarıdır. Bu xəstəliyə bəzən qıl dönməsi, dermoid sist də deyilir. Əksər hallarda büzdüm, bəzən isə qasıq, göbək və qoltuq nahiyələrində rast gəlinir.

 

Ağdaş Rayon Mərkəzi Xəstəxanasının ümumi cərrahı Elgiz Quliyevin Aztibb.az-a verdiyi məlumata görə, pilonidal sinusun ağırlaşmamış və ağırlaşmış formaları var. Ağırlaşmış formalar klinik gedişinə görə kəskin və xroniki olmaqla iki yerə bölünür. Kəskin forma abses və fleqmona şəklində, xroniki formalar isə təkrarlanan fistul, kista şəklində rast gəlinir. Dəridə əmələ gələn ciblərin dəlikləri yağ, tər və tüklərlə tutulduqda cib daxilində durğunluq, bu isə infeksiyanın inkişafına səbəb olur və xəstəliyin klinik əlamətləri başlayır.

 

Elgiz Quliyev bildirib ki, klinik olaraq ağırlaşmamış hallarda büzdüm nahiyəsində dəlik, dəlikdən açıq rəngli mayenin xaric olması və tük tıxacları olur. Ağırlaşdıqda isə adətən yerli iltihab əlamətləri: qızartı, şişkinlik, ağrı, yerli hipertermiya, funksiyanın pozulması kimi əlamətlər olur. Bəzən isə irinlik ətraf toxumalara yayılaraq fleqmona və büzdüm sümüyünün osteomielitinə səbəb olur.

 

Həkimin sözlərinə görə, diaqnoz əksər hallarda klinik əlamətlərə əsasən qoyulur. Diaqnostik çətinlik olarsa fistuloqrafiya və KT müayinəsi təyin oluna bilər. Müalicəsi dəridəki ciblərin ləğv olunmasından ibarətdir. Müalicə taktikası klinik formasından asılı olaraq dəyişir. Əgər ağırlaşmamış formadırsa travmatizasiyadan qorunmaq və gigiyen qaydalarına əməl etmək lazımdır. Abseslə ağırlaşıbsa absesin açılması və drenajı, iltihabı söndükdən sonra planlı qaydada ciblərin radikal çıxarılmasından ibarətdir. Xroniki formada isə Lazerlə, endoskopik və cərrahi üsullar tətbiq olunur. Cərrahi üsullar arasında birincili tikiş, yaranın açıq saxlanılması və dəri plastikası üsulları tətbiq olunur