Sumqayıt Tibb Mərkəzinin (STM) nəzdində fəaliyyət göstərən Perinatal Mərkəzdə prenatal skrininq proqramının həyata keçirilməsinə başlanılıb.

Mərkəzdən Aztibb.az-a bildirilib ki, bu məqsədlə mərkəzdə STM-nin tabeliyində olan ailə sağlamlıq mərkəzlərinin rəhbərlərinin, mama-ginekoloqların və şüa diaqnostikası üzrə həkimlərin iştirakı ilə təlimatlandırıcı toplantı keçirilib.

Perinatal Mərkəzin rəhbəri, STM-nin direktor müavini Təranə Rəcəbli prenatal skrininq haqqında toplantı iştirakçılarına geniş məlumat verib və bu proqramın həyata keçirilməsinin əhəmiyyətindən danışıb.

Bildirib ki, icbari tibbi sığortanın Xidmətlər Zərfində təminata alınmış prenatal testlərin aparılması, hamilələrə göstərilən xidmətin keyfiyyət göstəricilərini yüksəltməklə yanaşı, əlçatanlığını təmin edəcək.

STM-nin laboratoriyalar üzrə koordinatoru, həkim-laborant (klinik biokimya mütəxəssisi)
Cəlal Ağayev skrininqin aparılmasına dair diqqət edilməli olan əsas məqamları iştirakçıların nəzərinə çatdırıb.

Sonda toplantı iştirakçılarını maraqlandıran suallar cavablandırılıb.

Qeyd edək ki, prenatal skrininq xromosom patologiyaların rast gəlmə riskini individual təyin etməyə imkar verir.