"HUMAY" mükafatı laueratı, "Yaşıl eynəkli adam", "Ac həriflər", "Evləri köndələn yar", "İtkin gəlin", Güllələnmiş heykəllər" və digər filmlərin rəssamı, Əməkdar incəsənət xadimi, 80 yaşlı Rafael Əsədov Mərkəzi Gömrük Hospitalında uğurla əməliyyat olunub.
Aztibb.az xəbər verir ki, bu barədə Mərkəzi Gömrük Hospitalının Kardiologiya şöbəsinin rəisi, invaziv kardioloq İlqar Tahiroğlu sosial şəbəkədə paylaşım edib.
Paylaşımda deyilir: "Kino rəssamı Rafael Əsədov ürəyin atım gücü 25%, ağciyər təzyiqi 80, kritik aortal stenoz fonunda ciddi təngnəfəslik, boğulma, ayaqlarda şiş şikayətləri ilə son ümid olaraq xəstəxanamıza gətirildi. Yatırılıb vəziyyəti stabilləşdirildikdən sonra TAVİ əməliyyatı uğurla icra edildi.
Əməyi ən çox keçən kardiologiya komandası rezidentlərimiz, tibb bacılarımız başda olmaqla bütün komandamıza təşəkkür edirəm.
Ağlayaraq gələn rəssam ailəsi gülərək evinə göndərilmənin sevincini yaşayır. Rafael Əsədov ən qısa zamanda yeni ürəklə bizim komandamızın rəsmini çəkib xəstəxanamıza hədiyyə edəcəyini söz verdi.
Bütün dəstək üçün Gömrük Hospitalının baş həkimi Bəxtiyar Musayevə ayrıca təşəkkür edirəm".