TƏBİB tabeliyində fəaliyyət göstərən Yeni Klinikaya müraciət edən şəhid anası Qumru Balakişiyevanın aortal qapağın protezləşdirilməsi və aorta koronar şuntlama əməliyyatı uğurla icra olunub.

 

Bu barədə Aztibb.az-a Klinikadan xəbər verilib.

 

Təngnəfəslik, sinədə göynəmə və yanma şikayətləri ilə klinikaya müraciət edən 74 yaşlı xəstənin aortal qapağında daralma, çatışmazlıq həmçinin ürəyin tac arteriyalarında ciddi darlıqlar müşahidə edilib.

 

Üç saat yarım çəkən aortal qapağın protezləşdirilməsi və aorta koronar şuntlama əməliyyatını ürək-damar cərrahı, uzman həkim Əlizamin Yusifli həyata keçirib.

 

Əməliyyatı uğurla keçən xəstə artıq ambulator müalicə üçün evə yazılıb.

 

Qeyd edək ki, əslən Xocavənd rayonundan olan Qumru Balakişiyeva 10 yaşında şəhid olmuş Balakişiyev Məhəmmədəli Qəhrəman oğlunun anasıdır.