Naxçıvan Muxtar Respublikasının və Naxçıvan Muxtar Respublikası Səhiyyə Nazirliyinin 100-cü ildönümünə həsr olunmuş "100 il yaşa!" aksiyasının yekun yığıncağı keçirilib.

 

Naxçıvan MR Səhiyyə Nazirliyindən Aztibb.az-a verilən xəbərə görə, nazirin birinci müavini, nazir vəzifələrini icra edən Samiq Sadıxov çıxış edərək aksiya iştirakçılarına səmərəli fəaliyyətlərinə görə təşəkkür edib. O, Naxçıvanda səhiyyənin inkişafı ilə bağlı islahatların həyata keçirilməsinin əsas prioritetlərindən birinin əhaliyə müasir və keyfiyyətli tibbi xidmətlərin göstərilməsi olduğunu bildirib.

 

Samiq Sadıxov qeyd edib ki, ötən il səhiyyə sahəsində görülən işlər, aparılan islahatlar, təşkil olunan ardıcıl aksiyalar da məhz bu məqsədə xidmət edirdi. Yeni ilin ilk günlərindən başlayaraq həyata keçirdiyimiz "100 il yaşa!" aksiyası isə öz kütləviliyi ilə digərlərindən fərqləndi: Yanvar ayının 15-dən başlayaraq Naxçıvan Muxtar Respublikasının və Naxçıvan Muxtar Respublikası Səhiyyə Nazirliyinin 100-cü ildönümünə həsr olunmuş keyfiyyətli tibbi xidmətə əlçatanlığın təmin olunması və ilkin səhiyyə xidmətinin təkmilləşdirilməsi məqsədilə muxtar respublikanın bütün ərazisini əhatə dən “100 il yaşa!” adlı kütləvi-profilaktik tibbi müayinə aksiyasına başladıq. Aksiyada tərkibi terapevt, kardioloq, nevroloq, ginekoloq, pediatr, laborant, tibb bacısı və qrup rəhbəri olmaqla hər biri 8 nəfərdən ibarət 23 həkim qrupu yaradıldı. İşin səmərəli təşkili üçün aksiyaya 184 səhiyyə işçisi və 16 ambulans cəlb edildi".

 

Diqqətə çatdırılıb ki, həkim heyəti tərəfindən muxtar respublikanın bütün bölgələrində vətəndaşların ümumi qan analizləri, USM və EKQ müayinələri də daxil olmaqla kütləvi müayinələr aparılıb. Müayinələrlə yanaşı, qrup rəhbərləri tərəfindən vətəndaş müraciətləri qeydə alıb. Aksiyada Naxçıvan şəhəri, 7 rayon, 8 qəsəbə, 187 kənddə olmaqla ümumilikdə 5855 həkim müayinəsi, 1163 USM müayinəsi aparılıb, 1629 ümumi qan analizi yoxlanılıb, 692 vətəndaş müraciəti qeydə alınıb.

 

Sonda bir qrup səhiyyə işçisi aksiyada fəal iştirakına görə təşəkkürnamə ilə təltif edilib.