Xoşagəlməz ağız iyinin səbəblərinin 85%-ini ağız boşluğundakı problemlər təşkil edir. Bunun da böyük qisminə diş, diş daşları, diş əti və damaq xəstəkiləri aiddir.

Bu barədə  Aztibb.az-a məlumat verən Kliniki Tibbi Mərkəzin həkim-radioloqu Şəbnəm Topbaştekin bildirib ki, dişləri düzgün fırçalamadıqda və fırça ilə yanaşı diş sapı istifadə etmədikdə dişlərin arasında qalan yemək artıqları bakteriyalar tərəfindən parçalanır, çürüyür və pis qoxuya səbəb olur.

 
Radioloqun sözlərinə görə, dilinin üzəri ağımtıl ərplə örtülü olan insanlarda da xoşagəlməz iyə rast gəlinir ki, bu da mütəmadi olaraq təmizlənilməlidir:

"Səhər ağızda xoşagəlməz qoxunun olması isə normaldır. Bütün gecə ərzində bakteriyaların aktivliyi və ağızdakı quruluq buna səbəb olduğundan səhər yeməyindən sonra ağızdakı tüpürcəyin artması ilə əlaqədar bu əlamət keçib gedir". 

Şəbnəm Topbaştekin qeyd edib ki, qida maddələrinin tərkibindəki kimyəvi maddələr qana qarışır və bir hissəsi bədəndən xaric edilərkən özünəməxsus qoxu xaric edir. Buna görə də, soğan, sarımsaq və ya alkoqol qəbul edildikdən sonra ağızda spesifik qoxu əmələ gəlir.

"Mədə xəstəlikləri zamanı ağızda xoşagəlməz qoxunun olması nadir haldır. Yalnlz mədə ilə qida borusu arasındakı sfinktor gəyirmə zamanı açıldığında iy hiss olunur. Mədə möhtəviyyatının xaric edilməsini çətinləşdirən mədə çıxışı darlıqları zamanı mədə xərçəngi və qastritin bəzi növlərində ağız qoxusuna mütləq rast gəlinir", - deyə həkim əlavə edib.