23-25 yanvar tarixlərində Ümumdünya Səhiyyə Təşkilatının (ÜST) təşkilatçılığı ilə Danimarkanın Kopenhagen şəhərində İmmunlaşdırma üzrə Qlobal Alyansının (VİQA) dəstəklədiyi orta gəlirli ölkələrin Regional İşçi Qrupunun görüşü keçirilib.

 

Bu məlumat Aztibb.az-a ÜST-nin Azərbaycan Nümayəndəliyindən verilib.

 

Tədbirdə Azərbaycanı Səhiyyə Nazirliyinin ictimai səhiyyə və xəstəliklərin nəzarət şöbəsinin məsləhətçisi Oleq Səlimov, Sanitariya – gigiyena məsələlər üzrə Baş direktorun müavini Teymur Teymurov və TƏBİB-in ilkin səhiyyə xidməti şöbəsinin əməkdaşı Aygün Xəlilovanın daxil olduğu nümayəndə heyəti təmsil edib.

 

Regional İşçi Qrupunun görüşünün ümumi məqsədi ölkələrin Səhiyyə nazirliklərinin, ÜST və UNICEF-in Regional və Ölkə Ofisinin nümayəndələri daxil olmaqla əsas maraqlı tərəfləri bir araya gətirərək, immunizasiya ilə bağlı görülən işlər və gələcək planlarla bağlı müzakirələr aparmaq olub.

 

Görüşdə VİQA tərəfindən dəstəklənən orta gəlirli ölkələr üçün 2024-2025-ci illər üçün planlaşdırılan regional texniki yardım planı təqdim edilib. Eyni zamanda, 3 gün davam edən görüşün ikinci günü Azərbaycan nümayəndə heyəti ilə VİQA katibliyi arasında görüş keçirilib.

 

ÜST-nin və BMT-nin Uşaq Fondunun Regional və Ölkə nümayəndələrinin də iştirak etdiyi görüşdə peyvənd əhatəsində geriləməni azaltmaq və milli immunizasiya proqramında yer almayan yeni peyvəndlərin tətbiqini təmin edilməsində VİQA-nın dəstək imkanları təqdim edilib.