Bu yaxınlarda İsveçrənin Davos şəhərində keçirilən Dünya İqtisadi Forumunda səhiyyə sənayesi liderləri “X xəstəliyi” adlı yeni qlobal epidemiyaya hazırlaşmağın vacibliyindən danışıblar.

Aztibb.az-ın medimagazin.com.tr-yə istinadla xəbərinə görə, Ümumdünya Səhiyyə Təşkilatı (ÜST) daha əvvəl COVID-19 epidemiyası zamanı dünya iqtisadiyyatında baş vermiş dağıntıların, səhiyyə sistemlərinin dağılmasının və itkilərin təkrar yaşanmaması üçün hazırlıqların görülməsinin önəmini vurğulamışdı.

X xəstəliyi termini COVID-19-dan əvvəl ortaya çıxıb və 2018-ci ildə ÜST tərəfindən dərc olunan prioritet xəstəliklər siyahısına daxil edilib.

Səhiyyə mütəxəssisləri növbəti böyük pandemiyanın tezliklə baş verə biləcəyindən və COVID-19-dan daha ciddi ola biləcəyindən narahatdırlar.

X xəstəliyi hazırda real olmasa da, tədqiqatçılar, alimlər və ekspertlər belə bir virusla mübarizə aparmaq və səhiyyə sistemlərini mümkün pandemiyaya hazırlamaq üçün proaktiv fəaliyyət planı yaratmağa ümid edirlər.

İnsanın iqlimə təsiri, vəhşi təbiətin yaşayış yerlərinə təcavüzü və qlobal nəqliyyat kimi amillər heyvan mənşəli xəstəliklərin yayılmasına gətirib çıxarır. Bəzi ekspertlərin fikrincə, bunlar urbanizasiya, həddindən artıq əhali artımı və qlobal ticarətlə birləşərək daha çox epidemiyaların yaranması üçün ideal mühit yaradır.

Ötən həftə Dünya İqtisadi Forumunda ÜST prezidenti G.Tedros dünya liderlərinə müraciət edərək deyib: "Əlbəttə, bunun çaxnaşma yarada biləcəyini söyləyənlər var. Amma baş verə biləcək bir şeyi qabaqcadan görmək və buna hazırlaşmaq daha yaxşıdır. Çünki, belə hallar tariximizdə dəfələrlə olub və buna hazırlaşmaq lazımdır".