Bu gün ürək-damar cərrahı, Əməkdar həkim, Milli Məclisin Səhiyyə Komitəsinin sədr müavini, Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin rəisi, tibb elmləri doktoru Rəşad Mahmudovun 50 yaşı tamam olur.
Aztibb.az xəbər verir ki, Rəşad Mahmudov 18 yanvar 1974-cü ildə Astara rayonunda anadan olub. 1991–1997-ci illərdə 9 Eylül Universitetinin Tibb fakültəsində ali təhsil alıb. 1997–2003-cü illərdə Türkiyə Respublikası Ege Universitetinin Ürək-Damar Cərrahiyəsi Mərkəzinin doktorantı olub. 2003-cü ildə Türkiyə Respublikası Ege Universitetində uzmanlıq təhsili alıb.
O, dissertasiya işini uğurla müdafiə edərək 2006-cı ildə tibb üzrə fəlsəfə doktoru, 2015-ci ildə isə tibb elmləri doktoru elmi dərəcələrini alıb.
Rəşad Mahmudov 1997–2004-cü illərdə Türkiyə Respublikası Ege Universitetinin Ürək-Damar Cərrahiyəsi Mərkəzində, 2004–2005-ci illərdə Türkiyə Respublikası Kent Xəstəxanasında ürək-damar cərrahı işləyib. 2005–2017-ci illərdə Bakıdakı Mərkəzi Neftçilər Xəstəxanasının Ürək-damar cərrahiyəsi şöbəsinin müdiri və ürək-damar cərrahı, 2017–2018-ci illərdə isə Respublika Müalicəvi Diaqnostika Mərkəzində elmi-tədqiqat işləri üzrə direktor müavini vəzifələrində çalışıb. O, 2018-ci ildən Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin rəisidir.
Peşəkar həkim respublikada və beynəlxalq nəşrlərdə çap olunmuş çoxsaylı elmi əsərin müəllifidir. Həmçinin 1999-cu ildə Türkiyədə nəşr olunmuş "Aort Cərrahiyəsi" və 2014-cü ildə İtaliyada çap olunmuş "Trikuspid qapaq cərrahiyyəsi" kitablarının həmmüəllifidir. Alim iştirakçısı olduğu mötəbər simpozium, konqres və forumlardakı dolğun çıxışları ilə Azərbaycan səhiyyəsini layiqincə təmsil edib.
O, Avropa Kardio-Torakal Cərrahiyyə Cəmiyyəti, Türk Ürək-Damar Cərrahiyyəsi Dərnəyi, Turkiyə Ürək və Sağlamlıq Fondunun üzvü, Azərbaycan Ürək və Sağlamlıq Assosiasiyasının təsisçisi və sədri, eləcə də Azərbaycan Tibb Assosiasiyasının idarə heyətinin sədridir.
Həkim 2005-2015-ci illərdə Mərkəzi Neftçilər Xəstəxanasında 8000-dən çox açıq ürək əməliyyatları icra edib. Eyni zamanda, regionlarda (Naxçıvan, Lənkəran, Şirvan, Qəbələ, Zaqatala, Qazax, Gəncə, Şamaxı, Cəlilabad, Quba) yeni açılmış diaqnostik mərkəzlərdə 1000-ə yaxın açıq ürək əməliyyatları aparıb.
Rəşad Mahmudov Azərbaycan səhiyyəsinin inkişafındakı xidmətlərinə görə Prezident İlham Əliyevin müvafiq Sərəncamları ilə 2006-cı ildə “Tərəqqi medalı” ilə təltif edilib, 2014-cü ildə "Əməkdar həkim" fəxri adına layiq görülüb. Bundan başqa, 2009-cu ildə Heydər Əliyev Fondunun prezidenti Mehriban Əliyeva tərəfindən "Qızıl çinar" beynəlxalq mükafatı, 2019-cu ildə Azərbaycan Respublikasının Prezidenti tərəfindən "Azərbaycan Xalq Cümhuriyyətinin 100 illiyi" medalı ilə təltif olunub. O, həmçinin 2019-cu ildə Dövlət Gömrük Komitəsinin Fəxri fərmanına, 2022-ci ildə "Azərbaycan Respublikası Dövlət Gömrük Komitəsinin 30 illiyi (1992-2022)” Azərbaycan Respublikasının yubiley medalına layiq görülüb. 2023-cü ildə Özbəkistan Respublikası Namangan Dövlət Universitetinin "Fəxri professoru" seçilib.
O, öz peşəsini mükəmməl bilməklə yanaşı, həm də dövlətçiliyimizə sadiqliyi ilə seçilən şəxsiyyətdir. Rəşad Mahmudov ölkəmizdə cərəyan edən mürəkkəb ictimai-siyasi proseslərdə əsl vətəndaş mövqeyi tutub, milli mənafelərin müdafiəsi işinə sanballı töhfələr verib. Azərbaycan Respublikası Milli Məclis seçkilərində Yeni Azərbaycan Partiyasından namizədliyi irəli sürərək iki çağırış (2015 və 2020-ci illər) 77 saylı Astara seçki dairəsindən millət vəkili seçilib.
Aztibb.az portalı adından Əməkdar həkim Rəşad Mahmudovu 50 illik yubileyi münasibətilə təbrik edir, ona möhkəm cansağlığı, uzun ömür, elmi-təşkilati və siyasi fəaliyyətində uğurlar arzulayırıq.