10 yaşlı pasiyentimiz İbrahim 1 ilə yaxındır ki, kəskin eşitmə zəifliyindən əziyyət çəkib, bununla bağlı müxtəlif tibb müəssisələrində müalicə alsa da, effektiv olmayıb.

Bu barədə Aztibb.az-a Qazax Rayon Mərkəzi Xəstəxanasından məlumat verilib.

Bildirilib ki, xəstəxanada qulaq-burun-boğazın endoskopik müayinəsindən sonra həkim Gültac Qədimalıyeva tərəfindən İbrahimə 3-cü dərəcə adenoid hipertrofiyası və xroniki tonzillit dekompensə forma diaqnozu qoyulub.

Pasiyent audio və timpanometriya müayinəsindən keçirilib. B tip konduktiv eşitmə zəifliyi (burun ətinə bağlı olaraq) aşkarlanıb.

Gültac Qədimalıyeva tərəfindən pasiyentə adenotonzillektomiya cərrahi əməliyyatı icra edilib və artıq 5 gün sonra İbrahim tam normal eşitməyə başlayıb. Parasentez (qulaq pərdəsi arxasındakı mayeni çəkmək) əməliyyatına ehtiyac qalmayıb.

İbrahimin valideynləri Qazax Rayon Mərkəzi Xəstəxanasının bütün kollektivinə, xüsusən də Gültac Qədimalıyevaya minnətdarlıqlarını bildiriblər.