Simpoziumdan əvvəl Uu Öndər Hedər Əliyevin abidəsi üzərinə gül dəstələri qoyulub, Heydər Əliyev muzeyi ziyarət olunub.

 

Tədbirdə əvvəlcə Ümummilli Lider Heydər Əliyevin və torpaqlarımızın azadlığı uğrunda canından keçən şəhidlərimizin əziz xatirəsi bir dəqiqəlik sükurla yad edilib. Ardınca Dövlət Himni səsləndirilib.

 

Azərbaycan Respublikası Səhiyyə Nazirliyinin, Naxçıvan Muxtar Respublikası Səhiyyə Nazirliyinin, Milli Hematologiya və Transfuziologiya Mərkəzinin dəstəyi və Azərbaycan Hematologiya Mütəxəssisləri İctimai Birliyinin təşkilatçılığı ilə keçirilən simpoziumun əsas məqsədi respublikanın hər yerində hematologiya sahəsinin inkişafına təkan vermək və tibbi personala müasir protokolların vacib nüanslarını çatdırmaqdır.

 

Simpoziumun açılışında Naxçıvan Muxtar Respublikasının səhiyyə nazirinin birinci müavini, nazir vəzifəslərini icra edən Samiq Sadıxovun və Milli Hematologiya və Transfuziologiya Mərkəzinin icraçı direktoru Valeh Hüseynovun çıxışları dinlənilib.

 

Tədbirdə Naxçıvanda hematoloji xəstələrlə çalışan həkim və orta tibb işçilərinə nəzəri təlimlərin verilməsi və praktik bilik və bacarıqlarının artırılması məqsədilə Milli Hematologiya və Transfuziologiya Mərkəzinə ezamların təşkil olunması, həmçinin Naxçıvanda irsi qan xəstəliklərindən əziyyət çəkən pasiyentlərə xidmət keyfiyyətinin artırılması istiqamətində görüləcək işlər müzakirə olunub. Eyni zamanda, həmin gün Naxçıvan Muxtar Respublikası Mərkəzi Xəstəxanasında tibbi aksiya da keçirildi. Müxtəlif hematoloji problemi olan xəstələrin Bakıdan gələn həkim heyəti tərəfindən müayinələri aparılıb.