"Həkimlərimizi tanıyaq!" rubrikamızın növbəti qonağı Zərdab Rayon Mərkəzi Xəstəxanasının cərrahı Cabir Əhmədovdur. 

O, 1988-ci ildə Zərdab rayonunun Şıxbağı kəndində anadan olub. Azərbaycan Tibb Universitetinin Müalicə-profilaktika fakültəsində təhsil alıb.

Həkim cərrah 2011-2016-cı illərdə M.A. Topçubaşov adına Elmi Cərrahiyyə Mərkəzində (ECM) cərrahiyyə üzrə rezdentura keçib, cərrah mütəxəssis (Uzman) ixtisasına yiyələnib. O, həmçinin 2015-2016-cı illərdə Türkiyənin Ankara şəhərində cərrahiyyə üzrə ixtisaslaşma keçib. 2019-cu ildən M.A.Topçubaşov adına ECM-də qiyabi doktorantura təhsili alır.

Cabir Əhmədov 2016-2017-ci illərdə Ağcabədi Rayon Mərkəzi Xəstəxanasında həkim cərrah işləyib, eyni zamanda 2016-cı ildən Zərdab Rayon Mərkəzi Xəstəxanasında həkim cərrah kimi fəaliyyətə başlayıb. 2021-ci ildə Zərdab Rayon Mərkəzi Xəstəxananın Cərrahiyyə şöbəsinin müdiri təyin olunub.