Yüksəkixtisaslı həkim, uzman-patomorfoloq, dr. Zərifə Yusifli Mərkəzi Gömrük Hospitalının yeni yaradılmış "Patomorfoloji diaqnostika" şöbəsinin rəisi təyin olunub.

Dr. Zərifə Yusifli 2005-ci ildə Azərbaycan Tibb Universitetinin müalicə işi fakültəsini bitirmiş, 2005-2006-cı illərdə Respublika Klinik Xəstəxanasında oftolmologiya ixtisası üzrə internatura keçmişdir. O, təhsilini davam etdirərək 2011-2015-ci illərdə Türkiyənin Ankara şəhərində Hacettepe Universiteti Xəstəxanasında patomorfologiya ixtisası üzrə uzmanlıq təhsili almışdır. Hacettepe Universiteti Xəstəxanasının göndərişi ilə Zərifə həkim 2015-ci ildə 3 ay müddətində Amerika Birləşmiş Ştatlarının Atlanta Emory Universiteti Xəstəxanasında elmi araşdırmaçı kimi fəaliyyətə başlamışdır.

Z.Yusifli daha sonra 2016-2017-ci illərdə Ankara Haceteppe Universitetinin Patoloji Anabilim Dalı bölümündə Molekular patologiya ixtisası üzrə təkmilləşdirmə kursu keçmişdir. Dr. Zərifə Yusifli 2015-ci ildən Mərkəzi Gömrük Hospitalında həkim-patomorfoloq kimi fəaliyyət göstərmişdir. Daim öz üzərində çalışan, öz sahəsi üzrə tibbin ən son yeniliklərini öyrənərək fəaliyyətində tətbiq edən Z.Yusifli müxtəlif illərdə ölkəmizdə və xaricdə keçirilən konfranslarda, seminarlarda və təkmilləşdirmə kurslarında iştirak etmişdir.

O, 2014-cü ildə İngiltərənin London şəhərində XXVI Avropa Patoloji konqresində, 2015-ci ildə İtaliyanın Milan şəhərində XXXIX Avropa Sitoloji konqresində, 2018-ci ildə Türkiyənin Ankara şəhərində XXVIII Milli Patoloji konqresində, eyni ildə Türkiyənin İzmir şəhərində VIII Milli Sitopatoloji konqresində, 2019-cu ildə Fransanın Nitsa şəhərində XXXI Avropa Patoloji konqresində və digər nüfuzlu tədbirlərdə ölkəmizi təmsil etmişdir.