Həkim-psixiatr Əziz Mustafayev sosial şəbəkədə nevroz xəstəliyinin əlamətlərindən danışıb.

O, bildirib ki, nevrozun əsas əlamətləri aşağıdakılardır:

-Əmək fəaliyyətinin aşağı düşməsi, yorğunluq, həyat aktivliyinin zəifləməsi;

-Halsızlıq, həyəcan, narahatlıq, qorxu, məyusluq, ümidsizliyə qapanmaq;

-Əhval-ruhiyyənin tez-tez dəyişməsi, daim təşviş içində olmaq;

-Fobiyaların yaranması (məsələn, insan birdən-birə liftə, metroya və s. nəqliyyat vasitələrinə minməkdən qorxur);

-Yuxu ritminin pozulması, çətinliklə yuxuya getmək və ya yatıb-durduqdan sonra həqiqətən dincəlmək hissiyyatının olmaması;

-İştahın pozulması, vegetativ dəyişikliklər (başgicəllənmə, tərləmə, güclü ürək döyüntüsü);

-Tez-tez baş verən küt və ya pulsasiya şəkilli baş ağrıları, ürək ağrısı, qarın nahiyyəsində kəskin ağrı, boyun nahiyyəsində, çiyinlərdə, beldə ağrılar, əllərdə titrəmə və tərləmə halları;

-Patoloji səliqəlilik, beyindən çıxmayan fikirlərin və hərəkətlərin olması (məsələn, evdən çıxdıqdan sonra qaz, işıq, ütünün yanıq şəkildə qalmasından qorxaraq bir neçə dəfə geri qayıtmaq da mümkündür);

-Orqanizmin digər orqan və sistemlərində baş verən pozğunluqlar, iştahın pis və ya əksinə həddindən artıq güclü olması. Ürəkbulanma, qəbizlik, ishal, qarında ağrı, baş gicəllənməsi, arterial təzyiqin enib-qalxması, ürək döyüntülərinin tezləşməsi, ürək nahiyyəsində olan narahatlıq hissiyatı, cinsi pozğunluqlar və s.

Ə.Mustafayev özündə bu əlamətləri hiss edən insanları təcili həkim-psixiatra müraciət etməyi tövsiyə edir.