Naxçıvan Muxtar Respublikası Səhiyyə Nazirliyi ailə həkimliyi üçün beynəlxalq proqram əsasında, 3 modullu nəzəri-praktik təlimlərə başlayıb.

 

Aztibb.az-a Naxçıvan MR Səhiyyə Nazirliyindən verilən məlumata görə, təlimlərə Naxçıvanda tibb təhsili alan 6-cı kurs tələbələri cəlb edilib.

 

Naxçıvan Muxtar Respublikası Səhiyyə nazirinin birinci müavini, nazir vəzifələrini icra edən Samiq Sadıxov təlimdən əvvəl tələbələrlə görüşüb. Qeyd edib ki, ailə həkimi institutunun formalaşması üçün Naxçıvanda münbit baza mövcuddur. Hazırda əsas məqsədlərimizdən biri İlkin Səhiyyə Xidmətlərinin gücləndirilməsi və ailə həkimliyi institutunun inkişaf etdirilməsidir. Bununla həm göstərilən tibbi xidmətlərin keyfiyyəti, həm də əhalinin tibbi xidmətlərə əlçatanlığı artırılacaq. İlkin Səhiyyə Xidməti tibbin əsas və başlanğıc nöqtəsi olmaqla yanaşı, həm də səhiyyə xərclərinin səmərəsinin artırılması üçün beynəlxalq təcrübəyə əsaslanan, effektivliyi sübut olunmuş strategiyadır.

Səhiyyənin inkişafı sahəsində qabaqcıl təcrübəyə malik olan ölkələrdə səhiyyə sisteminin səmərəli fəaliyyətinin əsas hissəsini məhz İlkin Səhiyyə Xidmətinin inkişafı təşkil edir.

 

Samiq Sadıxov tələbələrə bildirib ki, sizlər 6-cı kursu bitirdikdən və ailə həkimliyi təliminin modullarını uğurla başa vurub sertifikatlarınızı aldıqdan sonra ailə həkimi kimi fəaliyyətə başlaya biləcəksiniz.

 

Qeyd edək ki, təlimin bir modulunun müddəti 21 gündür. Hazırda 22 tələbə təlimlərə qoşulub.