Hacıqabul Rayon Mərkəzi Xəstəxanasında 8 Noyabr - Zəfər Günü münasibətilə tədbir keçirilib.

Bu məlumat Aztibb.az-a xəstəxanadan verilib.

Tədbiri giriş sözü ilə açan Hacıqabul Rayon Mərkəzi Xəstəxanasının direktoru Natiq Əliyev Zəfər Günü münasibətilə iştirakçıları təbrik edib. Vurğulayıb ki, bu gün ölkəmizin tarixində ən şərəfli, ən əlamətdar gündür. İkinci Qarabağ müharibəsində qazanılan böyük qələbə xalqımızın yenilməzliyinin, dövlətimizin qüdrətinin təntənəsidir.

N.Əliyev qeyd edib ki, Azərbaycan Respublikasının Prezidenti İlham Əliyevin Ali Baş Komandanlığı ilə ordumuz 44 gün davam edən bu Vətən müharibəsində tariximizin möhtəşəm salnaməsini yaratdı.

İctimaiyyətlə əlaqələr üzrə mütəxəssis Həsən Səmədov və Ailə Sağlamlıq Mərkəzinin şöbə müdiri həkim-terapevt Gülşən Qəmbərova qalib Azərbaycan xalqının Müzəffər Ali Baş Komandan cənab İlham Əliyevin ətrafında sıx birləşərək bütün dünyaya öz gücünü, mətinliyini, mübarizliyini nümayiş etdirdiyini vurğulayıblar.

Daha sonra xəstəxana əməkdaşları Zəfər Günü ilə əlaqədar Hacıqabul rayonunda yerləşən Vətən müharibəsi şəhidlərinin xatirəsini əbədiləşdirən Abidə Kompleksini ziyarət ediblər.

Şəhidlərin xatirəsinə ehtiram əlaməti olaraq abidə önünə gül dəstələri düzülüb, onların ruhlarına dualar oxunub.