TƏBİB-in tabeliyində fəaliyyət göstərən Quba Rayon Mərkəzi Xəstəxanasında 8 Noyabr –Zəfər Gününə həsr olmuş tədbir keçirilib.
Xəstəxanadan Aztibb.az-a verilən xəbərə görə, ilk olaraq Azərbaycan Respublikasının ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.
Quba Rayon Mərkəzi Xəstəxanasında çalışan şəhid anaları, qazi və veteranların iştirakı ilə keçirilən tədbiri giriş sözü ilə xəstəxananın direktoru Əliyar Sərvərov açıb. O, ilk olaraq bu zəfəri bizə yaşadan şəhidlərimizə, qazilərimizə, veteranlarımıza minnətdarlığını bildirib.
Direktor Müzəffər Ali Baş Komandan İlham Əliyevin rəhbərliyi ilə Silahlı Qüvvələrimizin 44 günlük vətən müharibəsində əldə etdiyi tarixi zəfərdən bəhs edib. Vətən müharibəsi başladığı ilk gündən Quba Rayon Mərkəzi Xəstəxanasının hərbi qulluqçularımızın yanında olduğunu, həkim və tibb işçilərinin könüllü olaraq cəbhə bölgəsinə yollandığını vurğulayıb.
Daha sonra xəstəxananın Cərrahiyyə şöbəsində tibb bacısı kimi fəaliyyət göstərən şəhid anası Zumrud Xalıqova övladının qəhrəmanlığından danışıb.
Tədbirin sonunda Səhiyyə işçiləri həmkarlar ittifaqı tərəfindən müəssisədə çalışan şəhid anaları, qazilər və veteranlara bayram sovqatı təqdim olunub.
