TƏBİB-in tabeliyində fəaliyyət göstərən Qusar Rayon Mərkəzi Xəstəxanasında 8 Noyabr - Zəfər Gününə həsr olunmuş tədbir keçirilib.

Xəstəxanadan Aztibb.az-a bildirilib ki, tədbiri giriş sözü ilə tibb müəssisəsinin baş həkimi Əjdər Ağacanov açıb.

Daha sonra Dövlət Himni səsləndirilib. Şəhidlərimizin əziz xatirəsi bir dəqiqəlik sükutla yad edilib.

Əjdər Ağacanov öz çıxışında vurğulayıb ki, Azərbaycan əsgərinin, rəşadətli xalqımızın birliyi, həmrəyliyi nəticəsində ordumuz 44 gün ərzində döyüş meydanında öz gücünü göstərdi və qəhrəmanlıqla savaşaraq şanlı tariximizə Zəfər Günü yazdılar. Ali Baş Komandanın rəhbərliyi ilə döyüşənlər arasında Qusar rayon gəncləri də olub. 44 günlük müharibənin əsas qəhrəmanlarından olan həmin gənclərimiz tarix yazıb.

Tədbirdə xəstəxanada çalışan şəhid ailələri, qazilər, müharibə veteranları iştirak ediblər.

Vətən müharibəsinin iştirakçısı Qusar RMX-da Təhlükəsizlik bölməsinin rəisi, qazi Ruslan Kübərov çıxış edərək, müharibədə qələbə qazanmağının sevincini, döyüş xatirələrini iştirakçılarla bölüşüb.

Sonra çıxış edən Birinci Qarabağ müharibə iştirakçısı, müharibə veteranı, xəstəxanada Mülkü müdafiə üzrə mütəxəssis vəzifəsində çalışan Yaşar Məmmədov
bildirib ki, Azərbaycan torpaqları qarış-qarış, kənd-kənd işğaldan azad edildi. Uzun illərdən sonra doğma torpaqlarımızda yenidən üçrəngli şanlı bayrağımız ucaldılıb. Vətən müharibəsi Ali Baş Komandanın, Azərbaycan Ordusunun, xalqımızın zəfəri ilə başa çatıb. Bu qələbəni Ali Baş Komandanın qətiyyəti, siyasi iradəsi, ordumuzun şücaəti hesabına qazanıb. Ona görə 44 günlük qəhrəmanlıq savaşımız tarix boyu şanlı qürur mənbəyimiz olaraq qalacaq.

Qusar SİHİ-nın sədri Mühübali Cəfərov möhtəşəm Zəfər Günü münasibətilə tədbir iştirakçılarını təbrik edib.

Sonda SİHi tərəfindən müharibədə əməyi keçən tibb işçilərinə, təcili yardım avtomobillərinin sürücülərinə hədiyyələr və Fəxri fərmanlar təqdim olunub.