Naxçıvan Muxtar Respublikası Xəstəxanasında şəhid ailələri və qazilərlə görüş olub.

Nazirlikdən Aztibb.az-a bildirilib ki, Naxçıvan Muxtar Respublikası Səhiyyə nazirinin birinci müavini, nazir vəzifələrini icra edən Samiq Sadıxov şəhidlərimizin şücaəti, canı, qanı hesabına yaşadığımız şanlı tarix - 8 noyabr Zəfər bayramı münasibətilə onları ürəkdən təbrik edib.

O, Müzəffər Ali Baş Komandanımızın rəhbərliyi ilə qazandığımız Qələbədən bəri ötən 3 ildə ölkəmizdə hər birimizi qürurlandıran möhtəşəm nailiyyətlərin yaşandığını, qələbəmizin tamamlanması nəticəsində Zəfər bayramının bu il daha böyük sevinclə qeyd edildiyini diqqətə çatdırıb: "Əminik ki, şanlı bayrağımızın torpaqlarımızın hər qarışında dalğalanmasının təmin edilməsi nəticəsində şəhidlərimizin ruhu bu gün daha da şaddır. Bizimsə borcumuz şəhidlərimizin əmanətlərinin və qazilərimizin can sağlığının keşiyində layiqincə durmaqdır. Bu, hər bir tibb işçisinin mənəvi və vəzifə borcudur. Naxçıvan Muxtar Respublikasında hər bir tibb müəsisəsində şəhid ailə üzvləri və qazilərimiz növbəsiz olaraq bütün xidmətlərdən yararlana bilirlər".

Daha sonra şəhid ailələri kompleks müayinələrdən keçiblər.

Aksiyada 60 nəfərin 300-dən çox müayinəsi aparılıb.