Bakı Baş Səhiyyə Mərkəzində (BBSM) "İcbari tibbi sığorta çərçivəsində göstərilən tibbi xidmətlər üzrə meyarlar və nöqsanlar” mövzusunda təlim keçirilib.
Aztibb.az-a BBSM-dən verilən xəbərə görə, təlimdə Mərkəzin tabeliyində fəaliyyət göstərən tibb müəssisələri üzrə icbari tibbi sığorta işinə məsul şəxslər iştirak edib. Təlim Mərkəzin Monitorinq və nəzarət departamentinin Tibbi statistika və analitika şöbəsinin müdiri İradə İsmayılova tərəfindən keçirilib.
2023-cü ilin iyul ayının nəticələrinə əsasən həyata keçirilən təlimdə ilkin səhiyyə müəssisələrində yeni fəaliyyətə başlayan laboratoriyaların fəaliyyəti, xəstələrin müayinələrə göndərilməsi zamanı yaranan çətinlik və problemlər, tibb müəssisələrində müşahidə olunan nöqsanlar, nöqsanların aradan qaldırılması yolları və s. məsələlərlə bağlı məlumat verilib, onların həll yolları göstərilib.
İ.İsmayılova, həmçinin laborator xidmətlərin icrasının elektron sistemdə düzgün qeydiyyatının aparılmasının zəruriliyini vurğulayıb:
“Radioloji və laborator müayinələrin cavabları həkimlər tərəfindən sistemə daxil edilir. Bu, vətəndaşların anamnestik məlumatlarının elektron bazasının formalaşdırılması baxımından çox vacibdir”.
Sonda təlim iştirakçılarının müvafiq sualları cavablandırılıb və bu sahədə təlimlərin, maarifləndirici tədbirlərin sistemli şəkildə həyata keçiriləcəyi nəzərə çatdırılıb.
