Azərbaycan Pediatrlar Assosiasiyası mütəmadi olaraq uşaqlarla bağlı səhiyyə-sağlamlıq perspektivlərinin müəyyənləşdirilməsi, ana və uşaqların sağlamlığına, rifahına qayğı siyasəti, məktəbli uşaq və yeniyetmələr arasında reproduktiv sağlamlıqla bağlı maarifləndirmə istiqamətində təlimlərin təşkilinə xüsusi diqqət yetirir.

Aztibb.az xəbər verir ki, bu məqsədlə Azərbaycan Pediatrlar Assosiasiyasının birgə tərəfdaşlığı ilə “XXI əsrdə valideyn-uşaq münasibətləri. Milli-mənəvi və ailə dəyərlərinə əsaslanmış tərbiyə prosesi” mövzusunda təlimçi və fasilitator üçün təlim kursu keçirilib.

Təlim, eyni zamanda Dini Qurumlarla İş üzrə Dövlət Komitəsi, Ailə, Qadın və Uşaq Poroblemləri üzrə Dövlət Komitəsi, Azərbaycan Respublikasının Təhsil İnstitutu, Azərbaycan İlahiyyat İnstitutu və Ümidli Gələcək STİB-in birgə təşkilatçılığı ilə baş tutub.

Təlimin ilk günü Azərbaycan Pediatrlar Assosiasiyasının sədri, MDB Ölkələrinin Pediatrları Federasiyasının vitse-prezidenti, Azərbaycan Tibb Universitetinin dosenti, tibb üzrə fəlsəfə doktoru Təranə Tağı-zadə etdiyi açılış nitqində valideyn və uşaq münasibətləri fonunda yeni nəslin fiziki və əqli sağlamlığının qorunması baxımından kursun əhəmiyyətindən danışıb, zəruri tövsiyələr verib.

Təlimdə ekspertlər müasir dünyada ailənin vəzifələri və məqsədləri, uşaqları tərbiyə üsulları, erkən uşaqlıq dövründə inkişafa dəstək, reproduktiv sağlamlıq və cinsi tərbiyə, uşaqlarla uğurlu ünsiyyətin prinsipləri, şagird şəxsiyyətinin formalaşdırılmasına məktəb-ailə münasibətlərinin təsiri və digər mövzularda təqdimatlar ediblər.

Maarifləndirici təlimdə çıxışların ardınca iştirakçılar arasında faydalı fikir mübadilələri aparılıb və sonda iştirakçılara sertifikatlar təqdim edilib.

Üç günlük təlim noyabrın 1-də başa çatıb.