Türkiyənin səhiyyə naziri Fahrettin Koca Ümumdünya Səhiyyə Təşkilatından (ÜST) İsrailin Qəzzaya hücumlarından sonra Qəzzada səhiyyə xidmətlərinin təhlükəsizliyinə zəmanət verməsini istəyib.
Aztibb.az-ın medimagazin.com.tr-yə istinadla xəbərinə görə, F.Koca ÜST-nin baş direktoru Tedros Adhanom Ghebreyesus-a yazdığı məktubu sosial media hesabında paylaşıb.
Məktubda deyilir: “Qəzzada həyat, əgər buna “həyat” demək olarsa, iki həftədən çoxdur ki, çox ağır müharibə şəraitindədir... Ümumdünya Səhiyyə Təşkilatının Baş direktoru kimi mən sizin bu fövqəladə vəziyyətə göstərdiyiniz diqqətin fərqindəyəm. Hər şeydən əvvəl, insanlığa xidmətə sadiq bir insan və insan sağlamlığı müdafiəçisi olaraq, necə hiss etdiyinizi təsəvvür edə bilərəm. Günahsız mülki insanların həyatını itirdiyi, yaralı uşaqların səhiyyə xidmətlərinə müraciət edə bilmədiyi Qəzza üçün edə biləcəklərinizin indiyədək etdiklərinizdən qat-qat artıq olacağına ürəkdən inanıram.
Türkiyə Qəzzada müharibə qurbanları, xüsusilə də xəstə uşaqlar üçün lazım olan səhiyyə xidmətləri çatdırmağa, yaralıların müalicəsi üçün lazımi işləri görməyə hazırdır. Bəs "Əskik olan nədir?", bu, onlarən həyatını xilas etmək lazımi şəraitin yaradılmasıdır. Ümumdünya Səhiyyə Təşkilatının şüarlarından biri “hamıya sağlamlıq”, digəri isə “heç kəsi geridə qoymamaq”dır. Bir insan və ata kimi sizi bu iki şüarın həqiqət olduğunu bir daha təsdiqləməyə çağırıram".