Baş-boyun onkologiyası üzrə dünyaca məşhur mütəxəssis, professor Jatin Şah Milli Onkologiya Mərkəzində (MOM) olub.

MOM-dan Aztibb.az-a verilən məlumata görə, əvvəlcə o, Mərkəzin baş direktoru, akademik Cəmil Əliyevlə görüşüb.

Mərkəz haqqında qonağa məlumat verən akademik Cəmil Əliyev bildirib ki, ölkə Prezidenti İlham Əliyevin dəstəyi ilə Milli Onkologiya Mərkəzində ən müasir avadanlıqlarla təchiz olunmuş yeni korpuslar tikilib. Təməli 2006-cı ildə qoyulan cərrahiyyə korpusunun 2009-cu ildə açılış mərasimində dövlət başçısı da iştirak edib.

Akademik Cəmil Əliyev diqqətə çatdırıb ki, 2012-ci ildə Azərbaycan Respublikasının Birinci vitse-prezidenti Mehriban Əliyevanın təşəbbüsü ilə Milli Onkologiya Mərkəzinin nəzdində Uşaq Onkologiyası Klinikası fəaliyyətə başlayıb.

Daha sonra professor J.Şah Mərkəzin Baş-boyun cərrahiyyəsi şöbəsi və digər şöbələrini gəzib, Mərkəzdə yaradılan şəraitlə yaxından tanış olub, həkim və rezidentlərlə görüşüb.

Qeyd edək ki, J.Şah1986-cı ildə yaradılmış Beynəlxalq Baş-Boyun Onkologiyası Cəmiyyətləri Federasiyasının təsisçisidir. O, hazırda ABŞ-ın Cornell Universitetinin Weil Tibb Kollecinin cərrahiyyə üzrə professoru, Baş-boyun xidmətinin rəisi, Baş-boyun xəstəlikləri üzrə İdarəetmə  qrupunun rəhbəridir. Həmçinin prof. J.Şah Memorial Sloan Kettering Xərçəng Mərkəzində Baş-boyun onkologiyası şöbəsinin müdiridir.