22.09.2023-cü il tarixində Binəqədi Tibb Mərkəzinə təcili tibbi yardım vasitəsi ilə gətirilən Ə.Xalidədə yüksək hərarət, dodaqda şişkinlik, yaralar, ağız içi yaralar, boğazda qızarıqlıq, yuxarı və aşağı ətraflarda səpgilər və bəzi nahiyyələrdə epitel ayrılmalar müşahidə edilirdi.

 

Binəqədi Tibb Mərkəzindən Aztibb.az-a bildirilib ki, bütün bədən səthinin 80 faizdən çox hissəni əhatə edən yaralar, hipoalbunemiya, total proteində azalma, yüksək hərarət, sepsis və DDL sindromu xəstəliyin gedişi boyunca müşahidə edilib. Pasiyentə çox nadir rast gəlinən Toksik Epidermal Nekroliz (Layella sindromu) diaqnozu qoyulub.

 

Dərhal İntensiv terapiya və reanimasiya şöbəsinə yerləşdirilən xəstəyə Binəqədi Tibb Mərkəzinin rəhbərliyi tərəfindən mütəxəssis həkimlərin birgə baxışı təşkil edilib.

 

Mərkəzin həkim-allerqoloqu Nicat Əfəndizadənin müşahidəsi altında uzun müddətli göstərilən tibbi yardım nəticəsində xəstə 23.10.2023-cü il tarixində sağalma ilə evə yazılıb.