TƏBİB-də Koreya Ticarət və İnvestisiyaların Təşviqi Agentliyinin nümayəndələri ilə görüş keçirilib.

 

Aztibb.az bu barədə TƏBİB-in rəsmi feysbuk səhifəsinə istinadla xəbər verir.

 

Görüşdə TƏBİB-in İcraçı direktorunun müavini Araz Nəsirov, Beynəlxalq əməkdaşlıq departamentinin rəhbəri Ramin Ağayev, Strateji təhlil və inkişaf departamentinin rəhbəri Murad Mirzəyev, KOTRA-nın Azərbaycan üzrə baş direktoru cənab Kyekvon Co, böyük mütəxəssis Vüsalə Axundova və digər əməkdaşlar iştirak ediblər.

 

İcraçı direktorun müavini Araz Nəsirov qonaqlara TƏBİB-in fəaliyyəti barədə, eyni zamanda, tibb müəssisələrində xidmət keyfiyyətinin artırılması istiqamətində son illər görülən işlər barədə ətraflı məlumat verib. Bununla yanaşı, görüş zamanı TƏBİB-in Koreya ilə əməkdaşlıqda maraqlı olduğu tibbi sahələr xüsusi vurğulanıb.

 

KOTRA-nın Azərbaycan üzrə baş direktoru cənab Kyekvon Co ölkələrimiz arasında dostluq əlaqələrindən və son illər müxtəlif sahələrdə artan ticari əlaqələrdən bəhs etmişdir. Həmçinin, cənab Kyekvon Co səhiyyənin müxtəlif sahələrində kadr potensialının artırılması məqsədilə təlimlərin təşkilində və Koreya ilə təcrübə mübadiləsinin aparılmasında dəstək olmağa hazır olduqlarını diqqətə çatdırıb.