"Həkimlərimizi tanıyaq!" rubrikamızda söz açacağımız zəngin iş təcrübəsinə malik peşakar həkimlərimizdən biri də Dünyamalı Məmmədlidir.

 

O, 11 iyul 1955-ci ildə Neftçala rayon Qırmızıkənd kəndində anadan olub. 1973-cü ildə N. Nərimanov adına Tibb Universitetinin Pediatriya fakültəsinə daxil olub, 1979-cu ildə universiteti müvəffəqiyyətlə bitirib. Bir il Bakı şəhəri N. Nərimanov adına İnfeksiyon xəstəxanasında internatura keçib.

 

Dünyamalı Məmmədli 1981-1982-ci illərdə Xd-zona xəstəxanasında həkim işləyib. 1983-cü ildən indiyənədək Neftçala Rayon Mərkəzi Xəstəxanasının tabeliyindəki Kürkənd kənd həkim məntəqəsinin müdiri vəzifəsində çalışır.

 

1987-1989-cu illərdə Ə.Əliyev adına Həkimləri Təkmilləşdirmə İnstitutunun I və II Terapiya kafedrasında 3 aylıq terapevtik kurs keçib. Həmçinin Klinik kardiologiyada 2 aylıq təkmilləşdirmə kursu keçib.

 

O, 1991-ci ildə Azərbaycan Respublikası Səhiyyə Nazirliyinin nəzdində olan Ali Attestasiya komissiyasında imtahan verib, Dünyamalı Məmmədliyə Səhiyyə Nazirliyinin əmri ilə birinci dərəcəli həkim terapevt ixtisası verilib. 2003-cü ildə yenidən Daxili Xəstəliklər Klinikasında “Təxirəsalınmaz vəziyyətlər” kursu üzrə 2 aylıq tematik təkmilləşdirmə kursu keçib. 2010-2018-ci illərdə Həkimlərin sertifikasiyasından keçib.