Samux Rayon Mərkəzi Xəstəxanasının həkim-diyetoloqu Pərvin Mustafayeva Aztibb.az-a piylənmədən qorunmanın yolları barədə məlumat verib.

Diyetoloq bildirib ki, insanlar həyat boyunca müvafiq səviyyəli fiziki aktivliklə məşğul olmalıdırlar. Ən azı gündəlik müntəzəm şəkildə 30 dəqiqə fiziki aktivlik ürək-damar xəstəliyi, şəkərli diabet, yoğun bağırsaq və döş xərçəngi kimi xəstəliklərin yaranma riskini azaldır. Onun sözlərinə görə, əzələlərin bərkidilməsi və tarazlığı saxlamaq üçün edilən məşqlər yıxılma saylarını azaldır və yaşlı nəsildə hərəkətliliyi yaxşılaşdırır. Düzgün çəkini qoruyub saxlamaq üçün daha yüksək səviyyədə fiziki aktivlik tələb olunur.

“Sağlam qida sağlam həyat deməkdir. Xəstəliklərin çox böyük əksəriyyəti düzgün qidalanmamaq nəticəsində orqanizmdə maddələr mübadiləsinin pozulmasına gətirib çıxarır və müxtəlif mənşəli xəstəliklərlə insan qarşılaşır. Hər gün 2-3 litr çiy su içməyə vərdiş etmək, ilk ayda hər yarım saatdan bir 20-30 qram çiy su içmək bir müalicə üsulu sayilir. Çox sadə müalicə üsuludur. Bu müalicə üsullarından biri də, normal yuxu qəbul etmək əsas şərtlərdən biridir”, - deyə P.Mustafayeva əlavə edib.