Bu gün Milli Olimpiya Komitəsinin Ədalətli Oyunlar Komissiyasının, Azərbaycan Qan Donorluğunun İnkişafı Mərkəzinin birgə dəstəyi, lNBA Qlobal Avrasiya və lNBA Qlobal Azərbaycan Birliyinin təşkilatçılığı ilə Ümummili Lider Heydər Əliyevin 100 illiyinə həsr olunmuş natural bodibildinq və fitnes üzrə I Beynəlxalq Avrasiya Çempionatı keçirilib.
Bu barədə Aztibb.az-a Azərbaycan Qan Donorluğunun İnkişafı Mərkəzindən bildirilib.
Yarışdan öncə Ümummilli Lider Heydər Əliyevin və Vətən müharibəsi şəhidlərinin xatirəsi bir dəqiqəlik sükutla yad edilib. Daha sonra Dövlət Himni səsləndirilib.
Tədbirin bədii hissəsinə Azərbaycan Televiziyasının və Muğam Mərkəzinin solisti, "1st lNBA Eurasia Championship" beynəlxalq turnirinin fəxri səfiri Mirələm Mirələmovun ifası, həmçinin Azərbaycan Rəqs qrupu və Baku Band qrupunun çıxışı ilə yekun vurulub.
Daha sonra Milli Olimpiya Komitəsinin Ədalətli Oyunlar Komissiyasının sədri Xəzər İsayev çıxış edərək Ulu Öndər Heydər Əliyevin Azərbaycan idmanın inkişafına verdiyi töhfələrdən danışıb.
INBA Qlobal Azərbaycan və lNBA Qlobal Avrasiya Birliyinin prezidenti Elnur Şıxəliyev yarışın mahiyyəti haqqında vəlumat verib. O, ilk dəfə ölkəmizdə təşkil olunan I Avrasiya Çempionatında fiziki məhdudiyyətli idmançıların da iştirak etdiyini vurğulayıb. Bildirib ki, məqsəd fiziki məhdudiyyətli idmançıların təlim-məşq toplanışına cəlb edərək, onların beynəlxalq yarışlarda iştirakını təmin etməkdir.
Azərbaycan Televiziyasının və Muğam Mərkəzinin solisti Mirələm Mirələmov və INBA Qlobal Avrasiya və lNBA Qlobal Azərbaycan Birliyinin prezidenti Elnur Şıxəliyev Azərbaycan Qan Donorlarının İnkişafı Mərkəzinin idarə heyətinin qərarı ilə fəxri üzv qəbul olunublar. Fəxr üzv diplomlarını AQDİM-nin idarə heyətinin sədri Fuad Rəsul təqdim edib.
İdman yarışına ilk olaraq fiziki məhdudiyyətli idmançıların çıxışı ilə start verilib. Həmçinin turnirdə fiziki məhdudiyyətli şəxslərin, eyni zamanda irsi qan xəstəliyindən əziyyət çəkən uşaqların əl işlərinin sərgi-satış yarmarkası da təşkil olunub.
Çempionatda 100-ə yaxın idmançı Kids Fitnes, Fizikal Çelenced, Men's Fizik, Sport Model, Men's Atletik, Classic Fizik və Men's bodibildinq kateqoriyalarında mübarizə aparıblar.
Fərqlənən idmançılara diplom, medal, kubok və dəyərli hədiyyələr təqdim olunub.
Qeyd edək ki, yarış sonrası Azərbaycan Qan Donorluğunun İnkişafı Mərkəzinin təşkilatçılığı ilə hakimlər, atletlər və idarə heyətinin üzvləri "Sağlam olaq, Donor olaq!" devizi altında qanvermə aksiyasında iştirak edəcəklər.
