Hər ilin oktyabr ayı Ümumdünya Süd Vəzi Xərçəngi ilə Mübarizə Ayı kimi qeyd olunur. Günümüzdə demək olar hər 8 qadından biri bu dəhşətli xəstəliklə mübarizə aparır.

 

Bu barədə Aztibb.az-a Mingəçevir Şəhər Mərkəzi Xəstəxanasının şüa terapiya həkimi Xədicə Allahverdiyeva məlumat verib. Həkimin sözlərinə görə, süd vəzi xərçəngi döş toxumasında hüceyrələrin nəzarətsiz böyüməsi və çoxalması nəticəsində yaranan xərçəng növüdür. Yeni müalicə üsulları ilə xərçənglə mübarizə strategiyaları daim inkişaf etdirilir.

 

Xədicə Allahverdiyeva qeyd edib ki, süd vəzi xərçəngi ilə mübarizədə erkən diaqnoz uğurlu müalicə üçün vacibdir. Müntəzəm mamoqrafiya müayinəsindən istifadə etmək xərçəngin erkən mərhələlərini aşkarlaya bilər.

 

"Qadınlar bu sahədə hər hansı şübhəli hal gördükdə mütləq həkimə müraciət etməlidir. Erkən dövrdə diaqnoz edilən süd vəzi xərçəngi döş alınmadan da müalicə edilə bilər. Vaxtında həkimə müraciət edərək xəstəliyin ilk mərhələsinə ona qalib gələ bilərsiniz", - deyə həkim bildirib.