TƏBİB-in tabeliyində fəaliyyət göstərən Şəmkir Rayon Mərkəzi Xəstəxanasında “Ümummilli Lider və milli səhiyyəmizin inkişafı” mövzusunda tədbir keçirilib.

Bu barədə Aztibb.az Xəstəxananın feysbuk səhifəsinə istinadla bildirir.

Tədbirdə Şəmkir Rayon Mərkəzi Xəstəxanasının direktoru Emin İsmayılov çıxış edərək Ulu Öndər Heydər Əliyevin xüsusi diqqət və qayğısı sayəsində ölkədə səhiyyənin inkişafı və əhalinin sağlamlığının qorunması sahəsində əhəmiyyətli nailiyyətlərin əldə edildiyini söyləyib.

Direktor qeyd edib ki, Ümummilli Liderin rəhbərliyi ilə ölkənin səhiyyə sistemində ardıcıl və məqsədyönlü işlər görülüb, islahatlar aparılıb. Səhiyyənin hüquqi-normativ bazasının təkmilləşdirilməsi və dünya standartları səviyyəsinə çatdırılması daim diqqət mərkəzində saxlanılıb.

"Bu gün digər sahələrdə olduğu kimi, səhiyyə sahəsində islahatlar da Ulu Öndərin siyasi kursunun davamçısı Prezident İlham Əliyev tərəfindən uğurla davam etdirilir", - deyə bildirən E.İsmayılov əlavə edib ki, dövlət başçısının səhiyyənin inkişafına diqqət və qayğısı, Azərbaycan xalqının sağlamlığının qorunması yolunda atdığı mühüm addımlar, ümumiyyətlə ölkədə həyata keçirilən sosialyönümlü siyasət Ulu Öndərin bu istiqamətdə müəyyən etdiyi strategiyanın uğurla davam etdirilməsinin parlaq təzahürüdür.

Diqqətə çatdırılıb ki, yeni tikilən, əsaslı təmir olunan, ən müasir avadanlıqlarla təchiz edilən tibb mərkəzləri, tibb işçilərinin təkmilləşməsinə göstərilən diqqət Prezidentin Azərbaycan səhiyyəsinin inkişafı sahəsində gördüyü işlərin sübutudur.